O auxe dos centros de datos converte a CoreWeave no primeiro inquilino de Merlin, por riba de Endesa e Inditex

Os centros de datos converteranse en menos de dous anos na segunda actividade de Merlin, a socimi propietaria do centro comercial Marineda City, na Coruña. Ao peche de 2025, os de Ismael Clemente xa contaban con 44 MW operativos nas súas instalacións de Madrid, Barcelona e Euskadi, con unhas rendas de 31 millóns de euros no conxunto do exercicio, que irán incrementándose a medida que haxa máis capacidade. Coa previsión de chegar aos 64 MW en operación o próximo outubro e a 112 no segundo trimestre de 2027, o crecemento da súa nova área de negocio notase no seu particular ranking de inquilinos. Agora, o seu primeiro arrendatario é o xigante da IA CoreWeave, que xa supera a Endesa e a Inditex.

Unha área de negocio en expansión

Merlin obtivo o pasado exercicio un beneficio recurrente de 326,7 millóns de euros, o que supón un incremento do 5,1% respecto ao ano anterior, tras aumentar un 8,3%, en termos non comparables, as rendas que obtén polo aluguer dos seus activos, que alcanzaron os 542 millóns de euros.

Segundo explicou Clemente esta semana, nun encontro con xornalistas, cando alcance a previsión dos 112 MW no segundo trimestre do ano que vén, as rendas anualizadas dos centros de datos ascenderán a 167 millóns de euros, de forma que se converterá na segunda maior pata de negocio da socimi, só tras as oficinas, que o pasado ano ingresaron 292 millóns, por diante dos centros comerciais (133 millóns), e as naves loxísticas (86 millóns).

Maiores arrendatarios

Na súa memoria anual, remitida á CNMV e consultada por Economía Digital Galicia, os administradores da compañía especifican que o seu ranking de grandes inquilinos cambiou o ano pasado, irrumpindo como principal arrendatario o xigante americano da IA, CoreWeave.

A compañía asinou un acordo estratéxico con Merlin e Edged a mediados do ano pasado para instalarse na súa rede de centros de datos en España. Provedor de IA de Microsoft, pechou un acordo inicial coa socimi para alugar preto de 40 MW nos data center de Madrid, Barcelona e Álava. Trátase dun actor clave para os plans de futuro da cotizada española, xa que un novo contrato de Bilbao disparará as súas rendas por centros de datos o próximo exercicio.

CoreWeave pechou 2025 como primeiro inquilino de Merlin, con uns contratos que, inicialmente, vencen no período 2034-2035 e que supoñen un 8,8% do total de rendas do grupo. A multinacional participada por Nvidia superou así a Endesa, á que a socimi aluga oficinas e cuxos contratos representan un 3,7% do total de rendas.

Inditex pasou de segundo a terceiro gran inquilino de Merlin, con contratos en espazos de centros comerciais que representan un 2,9% das rendas. Detrás deles sitúanse, con espazos de oficinas, a Comunidade de Madrid, Técnicas Reunidas, PwC, Eurostars 4 Torres, do grupo Hotusa, BPI, Indra e IBM.

Áreas xeográficas

Por áreas xeográficas, o 46% dos ingresos que contabilizou Merlin o pasado exercicio procedían da Comunidade de Madrid, que aglutinou uns ingresos por arrendamento de 247,6 millóns. Cataluña incrementou os ingresos xerados no seu territorio, precisamente ao calor dos centros de datos, de 73,5 a 98,2 millóns de euros nun exercicio. En terceira posición está Portugal, que xerou uns ingresos próximos aos 70 millóns de euros, un 13% da cifra de negocio.

Por detrás sitúanse Castela A Mancha, Andalucía, Galicia, Comunidade Valenciana e Euskadi.

A comunidade galega, co activo do centro comercial Marineda City, na Coruña, xeroulle en 2025 uns ingresos de 19,5 millóns de euros.