O PP galego carga contra a SEPI por non actuar ante a crise de Losán: “Hai 800 empregos en perigo”

A secretaria xeral do PPdeG, Paula Prado, urxiu ao Goberno central a que actúe “de forma urxente para frenar a crise que vive o Grupo Losán“, coa que 800 postos de traballo (directos e indirectos) están “en perigo” en Galicia.

Nun audio remitido aos medios, informou de que representantes galegos do PP nas diferentes cámaras están presentando iniciativas para esixir ao Ministerio de Economía, ao Ministerio de Industria e á Sociedade Estatal de Participacións Industriais (SEPI) que “se poñan do lado das familias e do emprego” e que tomen unha decisión para reverter esta situación.

Alcaldes de Curtis e Vilasantar

Así o sinalou desde unha xunta en Curtis co alcalde da localidade, Javier Caínzos; o alcalde de Vilasantar, Fernando Pérez, e concelleiros doutros municipios como Oza-Cesuras, que se están a ver afectados pola crise desta empresa do sector da madeira. Precisamente, Caínzos, que lidera as reivindicacións dos municipios, destacou a “urxencia” dunha resposta “rápida, firme e sen demora”.

“Estamos ante unha situación moi delicada que o Goberno de España non está a escoitar”, lamentou Paula Prado, que tamén esixiu a Sánchez que teña en conta o plan de viabilidade económica que presentou en Madrid o Grupo Losán para “protexer eses postos de traballo que están en perigo e que son fundamentais para que a xente continúe a vivir no rural”.

A número dous do PPdeG tamén lle pediu ao BNG que se poña “do lado de Galicia” e que deixe de “apoiar incondicionalmente a Sánchez”. “Son moi bravos en Galicia e moi dóciles en Madrid”, reprochou.

Debate no Senado

Neste sentido, o PP presentou unha proposición non de lei no Congreso e no Senado. Concretamente, a do Senado debaterase o 16 de abril. “Veremos se [o PSOE e o BNG] están onde teñen que estar, cos traballadores, Galicia e co emprego no rural“, apuntou.

Os populares solicitan ao Goberno central que se convoque unha mesa de traballo institucional para coordinar unha solución integral, exercer as funcións que corresponden á SEPI como instrumento do Goberno en empresas estratéxicas e impulsar unha coordinación efectiva entre os ministerios competentes.

Ademais, piden que se recoñeza e atenda formalmente o acordo unánime adoptado polos concellos afectados en Galicia, trasladando unha resposta institucional ás súas peticións “no marco do principio de lealdade e cooperación entre administracións”.