O salto de Freire: construirá catro barcos para a Armada de Suecia desde o seu estaleiro en Vigo
Freire Shipyard asinou un contrato coa administración sueca para fabricar catro embarcacións de 47 metros de eslora e capacidade para 16 tripulantes.
Freire construirá catro buques de apoio naval para as Forzas Armadas de Suecia / Freire Shipyard
Comentarios
Freire Shipyard suma e segue. A empresa viguesa asinou un contrato coa administración sueca de material de defensa -que adquire equipos e servizos para as Forzas Armadas de Suecia- para a construción de catro novos buques destinados a misións de apoio naval.
Trátase de uns buques que terán unha eslora de 47 metros, alcanzarán unha velocidade máxima de 12 nós e contarán con autonomía de ata 10 días, con capacidade para 16 tripulantes. Cada unidade estará equipada con dúas grúas principais na cuberta principal e unha grúa auxiliar para provisións, o que permitirá realizar operacións de carga e descarga de forma autónoma. Á súa vez, disporá dunha rampla plegable para o acceso de vehículos por popa.
As embarcacións contarán cun sistema de propulsión diésel-eléctrica, formado por catro xeradores de velocidade variable conectados a dous buses de corrente continua. Este factor optimiza, segundo a empresa viguesa, “o consumo de combustible e reduce as emisións, cumprindo cos estándares ambientais máis esixentes”.
Disporán de dúas hélices propulsoras de tipo azimutal de paso fixo e unha hélice de manobra, todas elas accionadas por motores eléctricos. Estes buques poderán navegar en condicións de xeo e están deseñados para soportar condicións meteorolóxicas extremas.
