O presidente do Foro Económico de Galicia: «SAIC marca o camiño ao que podemos aspirar»

A chegada do grupo chinés SAIC a Ferrol e As Pontes tamén ocupou este mércores parte da presentación do anuario do Foro Económico de Galicia. O seu presidente, Víctor Nogueira, mantén na publicación que “SAIC marca o camiño ao que podemos aspirar”. Nogueira, que pertence a unha das sagas de grandes consignatarios de Galicia, advirte ante o desembarco do grupo chinés que “hai que seguir reclamando a necesidade de axilizar o máis posible os trámites administrativos que dependan de nós e seguir traballando na atracción e formación dun capital humano que hoxe non temos”.

No seu análise no anuario do foro, Nogueira sinala que o PIB de Galicia avanzou moi por riba da media europea e de socios clave como Francia, Portugal ou Italia. “¿Como manter ese diferencial nos próximos anos? Crescer por riba da eurozona ten que ser un obxectivo deliberado e non un efecto colateral de circunstancias favorables”, sinala o empresario na mencionada publicación, cuxo editor é o xornalista José Luis Gómez.

Vantaxes loxísticas potenciais

“En Galicia avanzamos moito en produtividade, e contamos con elementos moi positivos en termos de estabilidade institucional e diálogo social”, asegura Nogueira. “Ao mesmo tempo”, di, “a nosa posición marítima axuda polas vantaxes loxísticas potenciais. A recente decisión de SAIC de instalar unha fábrica de automóbiles entre Ferrol e As Pontes marca o camiño ao que podemos aspirar”.

Para o presidente do Foro Económico de Galicia, o impacto máis profundo da guerra de aranceis non está nas cifras de importacións ou exportacións directamente afectadas. “Está na incerteza que xera, na paralización de decisións de investimento e no encarecemento de cadeas de valor construídas pacientemente durante anos”, explica no seu análise. Ante esta situación, “a Unión Europea viu obrigada a repensar a súa política comercial, a súa autonomía estratéxica e a súa dependencia de determinados mercados e subministracións”. O FMI revisou á baixa as previsións de crecemento mundial para 2025 e 2026, abunda na súa explicación, “e boa parte desa corrección ten como causa directa a volatilidade arancelaria”.

Unha economía exportadora

“O sector do automóbil, a industria naval, o téxtil, a agroalimentaria: todos eles están expostos, en diferente medida, ás perturbacións do comercio internacional”, subliña. “A resposta correcta”, mantén, “pasa pola diversificación xeográfica de mercados, polo fortalecemento da competitividade interior e polo apoio á posición negociadora común da Unión Europea”. En tempos de fragmentación global, advirte Nogueira, quen mantén que quen teña apertura e calidade produtiva sae mellor parado”.

Poucas decisións de política económica chegaron con tanta forza e tan de súpeto como a escalada arancelaria impulsada pola Administración Trump ao longo de 2025. “O que en principio pareceu un instrumento de negociación comercial”, de acordo co análise do presidente do foro, “derivou nun cambio de réxime con efectos sistémicos sobre o comercio mundial, a confianza dos investidores e o propio multilateralismo que ordenou a economía global nas últimas décadas”.