A Xunta esixe duplicar o investimento da planificación eléctrica do Goberno en Galicia.

• Ilunion queda coa residencia doada por Amancio Ortega na Coruña
• A Xunta presiona ao TSXG para "desbloquear" os 70 parques eólicos paralizados

A Xunta presentará alegacións á planificación eléctrica do Goberno para que, do total de investimento de 13.000 millóns, Galicia pase a recibir do 2,5% a máis do 6%. A conselleira de Economía, María Jesús Lorenzana, denunciou este venres que a planificación, que se atopa desde este xoves en trámite de audiencia pública, é “unha ameaza clara” para o sector das renovables na actualidade polo que implica para a evacuación.

Na súa intervención ao peche dunhas xornadas sobre renovables, abogou por “conseguir que se converta nunha fortaleza”. A nova planificación eléctrica, lembrou a conselleira, “leva tempo de retraso, pero por fin en setembro activouse e onte publicouse e está o meu equipo analizándoa”.

“Como aínda se está analizando, non me gusta falar sen coñecemento intenso, pero si é certo que observamos que do total, que non sabiamos o que correspondía a Galicia cando tivemos a reunión co ministerio, de 13.000 millóns, Galicia percibimos arredor de 330 millóns. Isto é arredor do 2,5%”, advertiu.

Por iso, “o único” que trasladou é que a Xunta “non vai apoiar nin en ningún caso consentir que se fagan separatas enerxéticas coa planificación eléctrica”. Así, preguntouse “onde están o resto” de millóns, desde os 330 que atribúe á comunidade galega, ata 13.000.

“Haberá que velo”, insistiu, antes de indicar que por peso poboacional Galicia rondaría o 6% e a continuación apuntar tamén aos proxectos industriais e ao aporte ao sistema de renovables. “É lóxico pedir unha investición de máis dun 6%. Vamos a continuar, faremos as alegacións correspondentes”, adiantou.

Neste sentido, volveu mostrarse “moi preocupada” pola provincia de Lugo, “sen ningún reforzo” e “condenada a que non se poida instalar ningunha industria”, algo ao seu xuízo “dificilmente comprensible”. Non o mencionou, pero a Xunta lamenta que a planificación non contemple a subestación precisa para a instalación do polémico proxecto de Altri para Palas de Rei (Lugo).

Ademais, Lorenzana instou a “que se reforcen todos os nós para evacuación de proxectos”, tanto para a futura eólica mariña como para todos os proxectos de hidráulica e o futuro desenvolvemento de eólica a través da nova planificación.

“Baixón” das renovables

Con anterioridade, o presidente de Cluergal (o clúster das enerxías renovables), José Ramón Franco, lamentou, entre outras cuestións, que “non se saca adiante a subasta de eólica mariña”, e advertiu que o sector terá “un baixón”. “Haberá que ver cantas empresas seremos capaces de superar este bache”, insistiu.

Pola súa parte, a conselleira considerou que en Galicia “existe un futuro magnífico para o sector das renovables”, que “atraen industria”, e reivindicou a fortaleza da xeración.

Como outra “ameaza clara” apuntou aos “93 parques eólicos afectados por algún recurso xudicial”, deles, de acordo cos seus números, 86 paralizados e destes últimos, á súa vez, “78 por prexudicialidade casacional”. “Hai que ter en conta”, dixo, “que a tramitación dos promotores eólicos en Galicia e pola Xunta foi avalada ata catro veces polo Supremo e despois polo tribunal da Unión Europea”.

Pola parte da consellería, afirmou seguir “traballando” para sacar adiante a nova planificación do sector eólico. “Se as cousas saen como o Supremo e Europa sinalaron, quere dicirse que superaríamos xa a potencia eólica prevista no actual plan. É importante traballar nunha nova planificación porque existe aínda territorio onde podemos desenvolver proxectos e tamén por suposto eólica mariña”, fixo fincapé.

Así, abogou por “traballar anticipándose” e poder “aumentar o recurso eólico minimizando o impacto ambiental”. Segundo proclamou, “malia a quen quere poñer en tela de xuízo a instalación de industrias ou renovables, a Xunta ten unha postura firme e está convencida de que a cidadanía está entendendo a necesidade de implantación de renovables”.

“Somos máis os que estamos remando a favor. Vamos conseguilo”, concluíu, tras aludir á relevancia de que sexa a propia poboación a que demande a instalación de proxectos.