O Goberno desvela a súa planificación eléctrica: di adeus a Altri e dá a benvida á eólica mariña

O Ministerio para a Transición Ecolóxica iniciou a fase de audiencia pública da súa proposta inicial para o desenvolvemento da rede de transporte de enerxía eléctrica co horizonte posto en 2030. En esencia, os de Sara Aagesen propoñen reforzos en toda a rede española por valor de uns 13.600 millóns que permitan aos futuros proxectos enerxéticos ter conexión. O documento publicado este xoves certifica o que xa fora adiantado en semanas anteriores: o Executivo non conta para nada coa planta de fibras téxtiles de Altri, que queda sen enganche. Ademais, en Galicia premia ás zonas de transición xusta, As Pontes e Meirama, e senta as bases para a entrada da eólica mariña.

Segundo indican desde o departamento de Sara Aagesen, mentres que nas planificacións anteriores primouse o incorporar máis enerxía renovable ao sistema eléctrico, agora optouse por favorecer “aqueles proxectos que queren materializarse para consumir a enerxía limpa e competitiva do país, e aproveitar as oportunidades industriais, laborais, económicas e sociais da transición enerxética”. A vixente planificación considera dous gigavatios (GW) de demanda, mentres que esta proposta plantexa atender a máis de 27 GW.

Demandas singulares en Vigo, Meirama e As Pontes

Segundo a documentación consultada por Economía Digital Galicia, o Ministerio propón a ampliación de varias subestacións eléctricas para poder atender a “demandas singulares”. Plántexase un reforzo en Tomeza, Pontevedra, de 220 kilovoltios, así como Boimente (400 kV), Meirama (220 kV), e Maciñeira (400 kV). Ademais, tamén se proxecta unha nova subestación en Vigo, a de Bateas, de 2020 Kv, que conecte coa liña Atios-Pazos. Tamén se prevé unha nova subestación en Naraío, que tamén dará servizo a todo o entorno de As Pontes.

O documento publicitado por Transición Ecolóxica indica que este reforzo servirá “para dar apoio ás demandas singulares de Vigo, As Pontes, Meirama e Naraío”. Tamén se aposta por “permitir mellorar a seguridade de subministración da demanda da zona de Tomeza”, en Pontevedra, e facilitar “a evacuación de renovables na rede de distribución na zona de Boimente”, preto do complexo de Alcoa na Mariña lucense.

Estas actuacións terán un orzamento próximo aos 100 millóns de euros e prevése que entren en funcionamento entre 2027 e 2028.

Integración de renovables

Por outro lado, a planificación –que, agora, ábrese a alegacións.– tamén contempla outras actuacións para favorecer a “integración de renovables” á rede eléctrica. Para isto propón unha nova subestación eléctrica na zona de Abegondo de 220 kV e un novo transformador, así como o reforzo das liñas eléctricas que van desde Mesón do Vento, na Coruña, ás zonas da costa de Dumbría e Regoelle.

No sur de Pontevedra tamén se reforza a conexión a rede en Fontefría e repoténciase o eixe Tibo-Tomeza-Pazos de Borbén.

Para estas actuacións prevése un custo doutros 10 millóns de euros.

Sabón e Ferrol

Outras das zonas que se ven beneficiadas na planificación eléctrica son A Coruña e Ferrol, o que dará máis facilidade ao desenvolvemento de proxectos. Para iso, está previsto que, preto de Meirama, se constitúa un novo parque eléctrico, o de Ardora, de 220 kilovoltios. Tamén se proxectan ampliacións de capacidade en subestacións como a de Sabón e Agrela, en A Coruña.

Con estas actuacións, valoradas noutros 40 millóns, búscase “dar apoio á demanda futura” de enerxía nas zonas de As Pontes e Sabón, así como asegurar a seguridade do subministro tanto nesta zona como en Ferrol.

Eólica mariña

Por último, no documento publicitado este xoves, Transición Ecolóxica tamén propón outros reforzos eléctricos en distintas liñas no entorno de Mesón do Vento e As Pontes, na Coruña, e de Boimente e Xove, en Lugo, que “permitirán a conexión de renovables en Galicia, en especial, a integración da eólica mariña en zonas incluídas como prioritarias no borrador do Plan de Ordenación do Espazo Marítimo”.

O orzamento para estas actuacións achégase aos 90 millóns.

Proxectos favorecidos

Segundo puido saber Economía Digital Galicia, en teoría, esta planificación facilitaría o desenvolvemento de distintos proxectos industriais anunciados nos últimos anos ao calor da descarbonización.

Un dos máis reseñables é o val do hidróxeno de Ignis, que promove a través da súa filial Armonía Green. A compañía proxecta o desenvolvemento dunha planta de produción de amoníaco verde no Puerto Exterior de Punta Langosteira e outra de produción de hidróxeno na antiga planta de Alcoa que comprou Resonac na Coruña con unha capacidade de 200 megavatios, aínda que ampliable a 400. Esta iniciativa recibiu 130 millóns en fondos europeos. O reforzo do nó de Sabón tamén permitiría enchufar a planta de hidróxeno de 50 millóns que promove Acciona en Morás, con un electrolizador de 20 MW.

O mapa do Goberno tamén prevé actuacións que facilitarían as interconexións do proxecto Triskelion, promovido por Forestal do Atlántico co obxectivo de producir metanol verde en Mugardos; así como a planta de hidróxeno de Reganosa e EDP en As Pontes, e a fábrica de fibra reciclada de Ence neste mesmo municipio.