O BNG pide máis axudas polas vivendas queimadas: a Xunta dá 132.000 euros e Portugal 250.000
O deputado Luis Bará reclama a Alfonso Rueda que reduza a "excesiva" burocracia na solicitude das axudas para que as persoas afectadas polos incendios non teñan que "contratar unha asesoría".
Luis Bara y Ana Pontón / Europa Press
Comentarios
O deputado e viceportavoz do BNG, Luís Bará, considera que as axudas activadas pola Xunta pola vaga de incendios deste verán son “insuficientes” e afastadas da “realidade socioeconómica” de Galicia. Sinala particularmente os apoios para a reconstrución da vivenda habitual para aquelas persoas que perderon a súa casa por causa do lume.
Segundo indicou Bará, o máximo establecido polo Goberno galego de 132.000 euros é moito inferior a outras axudas similares de outros territorios. Por exemplo, advertiu que en Castela e León o importe ascende a 182.000 euros, mentres que en Portugal concédense ata 250.000 euros.
Por este motivo cre que estas liñas de apoio “non dan resposta nin á gravidade das perdas sufridas nin ás necesidades reais das persoas afectadas”, polo que deixan “sen cobertura” sectores económicos, vivendas, infraestruturas e mesmo o medio ambiente.
Sector primario e pemes
En relación ás actividades económicas do sector primario, o deputado nacionalista ve “absolutamente incomprensible” que non se contemple o lucro cesante. Isto, nas súas palabras, “compromete a continuidade das explotacións agrarias, gandeiras, forestais e apícolas”. Acerca da burocracia, pediu reducila, xa que considera que é “excesiva”, en tanto que “obriga” ás persoas afectadas a recorrer a asesorías externas, engadindo gastos “nun momento de máxima vulnerabilidade”. Nesta liña, tamén cualificou de “insuficiente” o prazo dun mes para a presentación de solicitudes e reclamou a súa ampliación, acompañada dunha resolución gradual das peticións e dunha flexibilización nos prazos da Axencia Tributaria de Galicia.
Ademais, o BNG propón unha axuda “directa, inmediata e non reembolsable” de 6.000 euros destinada a autónomos, pequenas e medianas empresas (Pemes) e iniciativas de economía social.
Patrimonio natural e cultural
Por outra parte, o deputado tamén criticou que as liñas de medio ambiente sexan “restrictivas” e “prioricen” a caza por diante das entidades de conservación e custodia do territorio, “esquecendo” a recuperación do patrimonio natural e cultural. Neste sentido, cualificou de “escandaloso” que non exista ningunha liña específica para a protección e recuperación do patrimonio arqueolóxico e etnográfico daniado polos lumes.
