O BNG quenta motores para as municipais: quere atar aos seus candidatos antes de agosto

• Pontón ve «insuficientes» as medidas do Goberno e clama contra a «parálise» de Rueda ante a crise de prezos
• O PP reivindica o investimento estrela de Ence en As Pontes e pide ao BNG que «non cambie de opinión» como con Altri

O Consello Nacional do BNG define a súa folla de ruta. O máximo órgano do partido entre asamblea aprobou o programa co que aspiran a lograr nas eleccións municipais de 2027 incrementar alcaldías e representación en todos os concellos.

Estará marcada por unha axenda “intensa” de mobilización con varias convocatorias e tamén por un obxectivo a curto prazo: ter designados en catro meses, antes do 25 de xullo, aos candidatos das sete grandes cidades. Así o anunciou a portavoz nacional do Bloque, Ana Pontón, nun discurso que comezou cun exame da situación política internacional e a proclama de “non á guerra”, e que rematou cun “adiante o BNG!“, en recordo do exrexidor de Allariz, Francisco García, un referente no nacionalismo galego municipalista, falecido a finais do pasado mes de xaneiro.

Segundo Pontón, o mundo vive “momentos complexos e difíciles”. Neste escenario, a líder do BNG reivindicou a condición da formación como “alternativa” ás portas da apertura dun ciclo electoral “intenso” que ten nas municipais de maio de 2027 a súa primeira cita. “O noso obxectivo é moi claro: conseguir máis concellos gobernados polo BNG e aumentar a nosa representación con máis edís e edilas ao longo de todo o país”, proclamou a líder do Bloque.

Para tal fin, destacou que é “importante” traballar “con planificación” e contacto “directo” cos veciños, antes de explicar que o Consello Nacional aprobou unha folla de ruta encamiñada a “impulsar” a organización e “chegar con todo preparado” á próxima cita coas urnas.

O calendario do BNG

Así, marcou o horizonte para a designación dos cabezas de cartel nas cidades (antes do Día de Galicia), pero tamén anunciou unha axenda “intensa” de mobilización municipal que inclúe tres citas: un encontro específico das cidades, outro de gobernos e cogobernos municipais, e un terceiro gran encontro nacional “multitudinario” que sirva como “pistoletazo de saída” cara aos comicios.

Alén de aumentar a representación nos concellos galegos, Pontón reivindicou a necesidade de “consolidar e afianzar” o proxecto do Bloque. A formación ten, dixo, “o mellor aval posible” nos propios “feitos” dos seus gobernos municipais, que demostran que “hai outra forma de facer política” e que poñen “ás persoas no centro”.

“Ese modelo é o mellor aval para pedir a confianza dos veciños e veciñas, e seguir ampliando a base social”, esgrimiu, antes de incidir en que os dirixentes do Bloque nos gobernos locais demostran no día a día que non están para “quentar a cadeira” nin para actuar desde a “rotina”. “Os nosos gobernos avanzan en igualdade, xustiza social, e apostan por crear espazos públicos de calidade, ademais de apostar pola nosa lingua e cultura. Prosperan porque poñen no centro ás persoas fronte a un PP que recorta e privatiza a costa da saúde, da igualdade e mesmo dunha vellez digna”, rematou.

En paralelo, a dirixente nacionalista apelou ao “contacto directo” cos veciños e veciñas, convencida de que as municipais son “outra oportunidade para seguir consolidando o avance do BNG“.

“Depende de cada un e cada unha de nós, da nosa capacidade de falar claro cos veciños, de explicar o noso proxecto e de tender pontes coas persoas que hoxe nos miran con esperanza, pero que aínda non deron o paso de coller a papeleta do BNG”, rematou.