O Concello de Santiago arremete contra Aena tralo a crise de Ryanair e solicita un plan estratéxico.

Os concellos afectados polo golpe de Ryanair en España acusan á compañía, pero tamén á xestión de Aena. A concelleira de Turismo e voceira do goberno de Compostela, Míriam Louzao, advertiu este mércores, tras o aviso de Ryanair do peche da súa base en Santiago, da cancelación de varias rutas e da redución de prazas en outras, de que a subida de taxas anunciada polo organismo estatal que xestiona os aeroportos para 2026 vai “en contra” do desenvolvemento de aeroportos medianos e pequenos, como o de Santiago Rosalía de Castro.

“Aena tivo en 2024 uns beneficios de 1.934 millóns de euros”, incide o goberno local, que tamén subliña que o recorte de Ryanair tamén afecta ao aeroporto de Vigo, o que interpreta como unha mostra máis da necesidade da elaboración dun plan estratéxico para as terminais galegas, que, ao seu xeito de ver, debería ser deseñado pola Xunta.

Plan estratéxico galego

Co fin de articular unha política aeroportuaria que, segundo Raxoi, tería que ser “coordinada e sen visións localistas”, Louzao manifestou que o Concello de Santiago continúa disposto a sentarse tanto coa Xunta, como cos outros dous municipios con aeroporto (Vigo e A Coruña) para poder avanzar.

Asimesmo, o goberno local admite “preocupación” pola plantilla que traballa na base de Ryanair, á que confía en que a compañía lles ofreza “unha solución satisfactoria”; ao tempo que lembra que “non ten capacidade” para influír nas decisións de “dúas grandes empresas” como son Ryanair e Aena, inmersas nunha batalla polas taxas aéreas.

Afectación “importante” en Compostela

Desde a perspectiva de demanda turística, recalca que haberá que esperar a ver a evolución da situación, aínda que lembra que, neste momento, está no mesmo nivel de estadías que o ano pasado, con 858.990, a pesar de que xa neste tempada de verán Ryanair fixo unha redución “importante na súa oferta de prazas”.

En todo caso, o goberno local admite que o anuncio da compañía aérea afecta “de forma importante” á oferta de conectividade para a poboación tanto de Santiago como do resto do país que utiliza o aeroporto compostelano como principal.

Investimento de 200 millóns de dólares

En concreto, a compañía informou do peche da súa base de dous avións en Santiago, que identifica con “a perda dun investimento de 200 millóns de dólares estadounidenses” en Galicia.

Ademais, procederá a cancelar as rutas a Madrid, Barcelona, Málaga, Alacant, Gran Canaria, Palma e Zaragoza, e unha redución de prazas noutras conexións que deixarán de ofertarse na temporada de inverno.

Así, a conectividade queda tocada aínda que en Santiago outras compañías operan as rutas con Madrid, Málaga, Granada, Palma e Barcelona. Sen conexión aérea, tras o recorte de Ryanair, quedaría a capital galega con Zaragoza e Alacant.