Roda, optimista cos lumes: “A situación está moito mellor”
O presidente da Xunta avanza que xa se está a traballar nun plan de "desescalada" que permita o retorno do persoal desprazado desde outras comunidades, unha vez que os técnicos determinen que os incendios están baixo control.
El presidente de la Xunta, Alfonso Rueda (1d), visita el puesto de mando avanzado de Quiroga, a 21 de agosto de 2025, en Quiroga, Lugo, Galicia (España). Carlos Castro / Europa Press
Comentarios
“Aínda queda moito traballo por diante, pero a situación está moito mellor do que era e confiamos en que siga esa tendencia”. É a valoración que fixo este xoves o presidente da Xunta, Alfonso Rueda, sobre a evolución dos lumes activos na comunidade. O mandatario galego visitou o Posto de Mando Avanzado de Quiroga acompañado pola conselleira de Medio Rural, Maria José Gómez, e o alcalde do municipio.
Rueda recoñeceu que neses momentos permanecen activos cinco incendios en Galicia, tras conseguir estabilizar o de Carballeda de Avia, “que tamén foi moi preocupante no seu momento”. O que máis inquieta agora é o de Larouco, que foi o que se estendeu ata a provincia de Lugo e que ameaza tamén o parque natural do Courel.
O presidente cualificouno como “o que máis nos preocupou desde o inicio e que previsiblemente acadará aínda unha maior extensión”. Non obstante, asegurou que os técnicos xa están traballando no perímetro e que o seguinte paso será avanzar cara á súa estabilización.
O presidente da Xunta quixo agradecer de maneira expresa o esforzo de todos os equipos que participan na extinción, desde as brigadas autonómicas, a UME, a Garda Civil, a Policía Autonómica e Protección Civil, ata os propios veciños, “que nos momentos máis duros tamén achegaron o ombreiro”.
Desescalada de efectivos
En canto á situación meteorolóxica, advertiu da previsión de subida de temperaturas durante a xornada de hoxe, aínda que confía en que as choivas anunciadas para a próxima semana axuden na loita contra o lume.
“Enfrontámonos a unha nova modalidade de lumes, os chamados de sexta xeración, e o de Larouco é un claro exemplo”, apuntou, lembrando as dificultades que xeran as correntes de aire e as explosións térmicas polos cambios de temperatura.
Malia a complexidade do escenario, Rueda mostrouse optimista e avanzou que xa se está traballando nun plan de “desescalada” que permita o regreso do persoal desprazado desde outras comunidades, unha vez que os técnicos determinen que os incendios están baixo control.
