Rueda ofrece a súa axuda polo accidente de Adamuz e avanza que «chegará o momento de esixir responsabilidades»
O presidente da Xunta de Galicia expresou o seu desexo de "que non suba o número de vítimas" e defendeu centrarse nas labores de rescate e na recuperación de todos os feridos.
Rueda comparece tras o Consello da Xunta. – DAVID CABEZÓN @ XUNTA
Comentarios
O presidente da Xunta ofrece o seu apoio aos familiares das vítimas do accidente de tren de Adamuz e ofrece “calquera tipo de axuda” para as labores de rescate. Alfonso Rueda subliñou este martes que o Goberno galego está “totalmente á disposición” e por iso xa falou co presidente da Xunta de Andalucía, Juanma Moreno.
“Estamos á súa disposición para calquera tipo de axuda de calquera clase, iso por descontado”, indicou, e engadiu que “por desgraza, moita xente está a revivir escenas moi duras” co sinistro de Córdoba, en referencia ao accidente do Alvia na curva de Angrois en xullo de 2013.
Por iso, “esa oferta é especialmente intensa e especialmente sincera”, remarcou. “Calquera cousa que precisen teñen, por suposto. Entendo que agora mesmo é unha cuestión de dificultades técnicas; estaban contando o difícil que é acceder aos vagóns, aínda hai que levantar, é posible que haxa máis vítimas, incluso algunha xa localizada pero non retirada do lugar”, relatou.
Rueda expresou o seu desexo de “que non suba o número de vítimas”, abogou por centrarse no rescate e na recuperación dos feridos, así como no apoio ás familias “que aínda non saben onde están os seus familiares”.
“Chegará o momento de saber as causas e no seu caso esixir responsabilidades”
Neste sentido, agradeceu que as forzas políticas, “con algunha excepción”, estean “a o que hai que estar”, que é, segundo insistiu, “terminar o rescate, auxiliar ás vítimas e apoiar ás súas familias”.
De cara ao futuro, Rueda avanzou que “chegará o momento de saber as causas e no seu caso esixir responsabilidades” por este accidente. “Chegará e creo que ten que chegar o momento de saber as causas. Comezaron, segundo nos contan, as investigacións e no seu caso esixir responsabilidades. Pero creo que o momento a 48 horas do accidente é facer o que se está facendo”, concluíu.
