Os recortes en Nestlé de Isla e Navratil en Europa ceban en España e Reino Unido máis que en Francia e Alemaña
O xigante alimentario prevé a saída de 760 empregados en conxunto nos seus territorios español e británico, máis que en Francia, Alemaña e Italia xuntas.
Pablo Isla e Philipp Navratil. Nestlé
Comentarios
Dos grandes mercados europeos de Nestlé, de momento, Reino Unido e España concentran o groso das saídas que a multinacional vai paulatinamente anunciando, dentro do plan posto en marcha para reducir a súa plantilla, a nivel global, en case 16.000 empregados, o 6% do seu persoal. En territorio británico, os sindicatos anunciaran que pretende acometer un golpe que afectará unhas 450 persoas mentres que en España plantexou o despedimento de unhas 310. Uns números moi superiores aos de Alemaña, Francia e Italia, países nos que prescindiría dos servizos de uns 625 empregados, en conxunto.
Pablo Isla accedeu á presidencia do consello de administración de Nestlé en outubro de 2025, nun movemento que se propiciou para acompañar o seu cargo, non executivo, co nomeamento un mes antes do novo conselleiro delegado, Phillip Navratil. O CEO foi o encargado de anunciar a intención da empresa de acometer un drástico recorte de plantilla, que sobre todo afectaría ao persoal de oficina e que liquidaría un 6% da plantilla a nivel mundial. A finais do pasado exercicio, segundo a súa última memoria anual consultada por Economía Digital Galicia, a multinacional declaraba ter factorías en 75 países nos que empregaba, en conxunto, unhas 271.000 persoas.
España crece en vendas fronte ao resto de países europeos
Foi este mes de abril cando a compañía comezou a anunciar os seus plans de despedimento en distintos territorios europeos. Hai pouco máis dunha semana, Nestlé España anunciou a súa intención de iniciar un expediente de regulación de emprego (ERE) que afectará a 301 traballadores no país, entre persoal de oficinas, equipos de venda, centros de distribución e algúns de produción. Das 10 fábricas que suma no país, os centros de Pontecesures (Pontevedra), Sebares (Asturias), A Penilla (Cantabria), Miajadas (Cáceres), Reus (Tarragona) e Girona veranse impactados pola medida.
Os sindicatos posicionáronse radicalmente en contra da medida, que afecta a un 7% da plantilla total en España. Entre outras cuestións, argumentan que o xigante suízo marcou récord de vendas en 2025 no país. Esa facturación récord ascendeu a case 2.900 millóns de euros, unha cifra de negocio impulsada polo incremento das vendas nacionais, que medraron un 5%, ata os 1.619 millóns, así como o crecemento das exportacións.
Francia e Alemaña, outras grandes prazas de produción da compañía en Europa, reduciron vendas en 2025. O territorio galo pasou de 3.437 millóns de francos suízos a 3.398, uns 3.668 millóns de euros ao cambio, mentres que o negocio alemán diminuíu de 2.008 a 1.921 millóns de francos suízos, 2.078 millóns de euros.
Nestes dous países, nos que conta con 12 fábricas en cada un, o recorte de emprego será menor. En Alemaña, segundo a prensa local, o axuste afectará a unhas 260 persoas e, neste caso, “os recortes afectarán principalmente ás áreas administrativas, mentres que as de operacións permanecerán intactas”. As sedes de Frankfurt am Main, Düsseldorf e Euskirchen concentrarán o groso do golpe, segundo a prensa.
En Francia, e sempre segundo a información que recolleu a prensa do país, Nestlé propón a saída de 180 persoas. Explican que o maior impacto o experimentará o persoal da sede central en Issy Les Moulineaux, así como os centros de investigación e desenvolvemento de Tours e Lisieux. Son os lugares onde se idean os produtos e se levan a cabo as tarefas administrativas.
Segundo a prensa, Nestlé indicou que o número de baixas podería reducirse, limitando as forzosas e priorizando as transferencias internas, as baixas voluntarias e as xubilacións.
Os anuncios de recortes vanse coñecendo pouco a pouco, aínda que o programa de redución de custos debería, en principio, estar culminado en 2027. Esta semana tamén houbo malas novas para os empregados italianos. Segundo os medios locais, de momento, indicouse a intención de despedir unhas 185 persoas, só en Milán.
Reino Unido e os grandes mercados por vendas
En todo caso, ata a data, en Europa, a cifra máis alta de redución lévaa Reino Unido, onde conta con oito plantas de produción. Tamén neste territorio se reduciron vendas en 2025, ao contrario que en España. De 3.617 millóns pasouse a 3.598 millóns de francos suízos, case 3.900 millóns de euros.
En territorio británico, o sindicato GMB indicou que a multinacional propón recortar uns 450 empregos, principalmente nas plantas de York e Gatwick.
Todo isto, á espera de como afectará o recorte ao resto de países. Estados Unidos e China son os territorios onde conta con máis plantas de produción. En EE UU suma 55 fronte ás 24 de China. Son os seus territorios con maiores vendas. En Norteamérica sumou 28.605 millóns de francos suízos fronte aos case 4.900 do mercado chinés.
