Pontón expresa en Arxentina o seu apoio á expresidenta Kirchner: “É un claro caso de lawfare”

Ana Pontón, voceira nacional do BNG, trasladou nun encontro coa expresidenta de Arxentina Cristina Fernández de Kirchner a preocupación do Bloque por “o lawfare e o avance da extrema dereita”. Segundo explicaron desde a formación nunha nota de prensa. Pontón trasladou o apoio do BNG á exmandataria arxentina ante o que considera “un claro caso de lawfare”, similar, dixo, “ao sufrido por outros líderes” como o actual presidente de Brasil, Lula da Silva.

Na reunión, analizaron a situación política da rexión e a xeopolítica internacional e coincidiron en compartir a súa preocupación polo “avance da extrema dereita”, simbolizada en Arxentina en “o Goberno de Javier Milei”. Un avance das “forzas ultra” que Pontón cualificou de “ameaza para a democracia e para a mantenza dos dereitos e liberdades colectivas e individuais”.

Neste contexto, a voceira nacional do BNG trasladou o seu orgullo polo feito de que en Galicia a extrema dereita teña “nula representación institucional”, o que atribuíu a que a cidadanía ten no BNG “unha alternativa ao PP a favor da maioría social”, fronte a un Partido Popular “cuxo discurso e propostas se asemellan máis ás da extrema dereita”.

Máis axudas para o retorno de inmigrantes

Deste modo, Ana Pontón segue coa súa axenda de reunións en Arxentina, onde tamén mantivo un encontro coa directiva do Colexio Santiago Apóstol e no Centro Galego de Bos Aires.

Alí, destacaron os nacionalistas, avanzou que o BNG prevé aproveitar a tramitación dos orzamentos de 2026 para reclamar, vía emenda, un incremento do 50% na financiación para facilitar o retorno dos galegos que así o desexen.

“Galicia é un país de acollida e con un gran potencial que necesita man de obra en moitos dos nosos sectores produtivos: no sector mar-industria, no sector agrogandeiro como factor importante para revitalizar o medio rural, no sector da construción e dos servizos. E desde o BNG propoñemos unha Galicia aberta e inclusiva, onde todos os galegos da emigración son benvidos”, subliñou.

Neste sentido, a proposta do Bloque pasa por aumentar as partidas orzamentarias destinadas a facilitar o retorno de emigrantes galegos, ata alcanzar os 21 millóns de euros.

“Se realmente apostamos por atraer talento e man de obra formada, hai que ser ambicioso na financiación”, reivindicou Pontón, que sinalou que se trata dunha proposta viable.

Así mesmo, na súa visita ao Centro Galego de Bos Aires, acompañada pola eurodeputada Ana Miranda, a líder nacionalista puxo enriba da mesa a necesidade de que a Xunta teña unha maior implicación na conservación do patrimonio cultural da diáspora, con pezas tan emblemáticas como a obra de Castelao ‘A derradeira lección do mestre’.

Nesta liña, explicou que é partidaria de establecer un plan plurianual, que garanta unha financiación estable e regular, para colaborar coa diáspora na preservación e posta en valor do legado cultural acumulado durante décadas.