Tino Fernández supera os 255 millóns en vendas con Altia e Boxleo, pinchazo na rendibilidade e crece no ladrillo

Transición en Boxleo TIC, o holding de Tino Fernández co que controla Altia e todas as súas filiais e mesmo participacións como Élite Administración e Xestión, centrada no fútbol. E é que Boxleo, en 2024, supera os 255 millóns en vendas, pero a súa rendibilidade acusou o crecemento a través de compras dos últimos anos e marcou un forte aumento da súa carteira inmobiliaria.

Concretamente, o Grupo Boxleo TIC, que aglutina todos os negocios do expresidente do Deportivo, incrementa os seus ingresos case un 6%, o marxe de ebitda diminúe e case duplica as súas inversións inmobiliarias nun ano. Esta ben podería ser a foto fixa dun grupo que é xa referencia no sector TIC en España, con case 3.700 profesionais ao final do exercicio, con proxectos desenvolvidos en practicamente todos os sectores e cunha cada vez maior presenza internacional (43,7% do total de ingresos), “que se canaliza a través de Noesis e as súas filiais, Chile, o negocio na UE, principalmente en organismos europeos, desenvolvido tanto por Altia European Services e Altia como por Bilbomática e, nos últimos anos, en Andorra e Francia”, sinala o grupo de Tino Fernández.

Cae o marxe de ebitda

O volume de negocio aumentou un 5,9% en relación ao obtido en 2023. O Grupo Boxleo, principalmente dinamizado por Altia e as súas sociedades dependentes, “continuou a tendencia de crecemento orgánico de anos precedentes durante o presente exercicio cun esforzo comercial e de execución importante”, di o grupo nas contas presentadas no Rexistro Mercantil da Coruña. Pero tamén houbo nestes anos un crecemento inorgánico (compras) que acusou o grupo.

O beneficio antes de intereses, impostos, depreciacións e amortizacións (ebitda) que obtivo Boxleo en 2024 sitúase en 23,3 millóns de euros, cun aumento dun 1,6% respecto aos 22,9 millóns logrados en 2023. Con todo, explica o grupo, o resultado antes de impostos alcanzou un máximo histórico de 16,5 millóns, un 7,3% máis que o obtido en 2023. En canto ao resultado despois de impostos, o incremento é máis moderado, un 2,2% (10,9 millóns en 2024 fronte aos 10,7 millóns de 2023), como consecuencia dun maior impacto fiscal na conta de resultados en 2024.

Máis investimento en ladrillo e máis Élite

Os xestores de Boxleo tamén destacan a evolución na súa actividade inmobiliaria, a través da súa sociedade cabeceira, que “continua cunha xestión e busca activa de oportunidades que reforcen a solidez do grupo e diversifiquen os riscos derivados da súa actividade”. De feito, en 2024, as inversións inmobiliarias do grupo de Tino Fernández alcanzan os 8,1 millóns de euros, cun sustancial crecemento sobre os 4,4 millóns declarados un ano antes.

En síntese, Boxleo considera que as últimas contas anuais “poden considerarse satisfactorias malia a lixeira caída na rendibilidade ordinaria do grupo”. “Son unha boa base para seguir aumentando as vendas”, di, “para manter unha carteira diversificada, para continuar internacionalizándose, para pouco a pouco seguir recuperando os niveis de rendibilidade que o grupo ten tido historicamente e, por suposto, para seguir xerando caixa e aumentando a solvencia vía aumento de fondos propios, así como recuperar os niveis de fondo de maniobra nos que habitualmente o grupo foi desenvolvendo a súa actividade”. 

A recuperar o ritmo

Entre as novidades deste ano, con data de febreiro, Boxleo subscribiu 76.373 novas participacións de Élite Administración e Xestión SL, sociedade conxunta con Ignacio Rivera e outros socios coa que controla, por exemplo, o Racing de Ferrol. A ampliación foi por un valor nominal de 763.730 euros, a través dunha ampliación de capital. En consecuencia, actualmente, o seu porcentaxe de participación ascende ao 23,5%. E a operación de compra de Verne Information Technologye a súa liña de negocio de Data e IA ascendeu, segundo consta nas contas, a 3,8 millóns de euros.