A venda de Aludec deixa a Marsan e Copo como únicos grandes provedores de Stellantis con capital 100% galego.
Aludec segue os pasos de Maviva ou Viza tras a súa compra por parte de CIE Automotive e prolonga a onda de vendas entre os principais representantes galegos da industria da automoción.
Patricia Argerey Vilar, directora da Axencia Galega de Innovación (Gain), nunha visita ás instalacións do Grupo Copo, xunto ao seu CEO, José Antonio Rodríguez Estévez. Xunta
Comentarios
Outro histórico provedor de Stellantis en Galicia volve a despertar o interese dun xigante da automoción. CIE Automotive anunciou este mércores a adquisición de Aludec, empresa con sede en Ponte Caldelas e que conformaba, ata agora, o cada vez menos nutrido grupo de empresas do sector do motor con capital 100% galego, no que agora brillan só dous nomes propios: Marsan e Copo.
A través dun comunicado, CIE Automotive desvelaba que o «valor da transacción (enterprise value) ascende a aproximadamente 200 millóns e que «o prezo da operación será aboado en metálico no peche e mediante caixa actualmente dispoñible». Mediante esta operación, a cotizada española toma o control dunha empresa que exerce como líder europeo en emblemas, monogramas e letterings desde a súa base de operacións en Ponte Caldelas.
Aludec cambia de mans como xa o fixeron no pasado outros provedores galegos de referencia para Stellantis como o caso de Maviva ou Viza. A primeira estaba especializada en operacións de loxística de alto valor engadido, control de calidade e pre-ensamblaxe de compoñentes para a industria da automoción. Presidida por aquel entón por Maruxa Sanmartín (filla do fundador), Maviva contaba con medio milleiro de empregados e unha facturación próxima aos 21 millóns de euros antes de que pasase a mans de Ferrovial.
O precedente de Maviva
Con capital 100% galego, na listaxe de clientes de Maviva sobresaían nomes como PSA (catro anos despois rebautizarase como Stellantis tras a súa fusión con Fiat Chrysler), Saint-Gobain, Delphi, Antolín, Continental ou Gestamp. Dáse a circunstancia de que esta última naceu ao abeiro da propia CIE Automotive e aglutinaba a división de estampación metálica ata a súa escisión en 2013.
Acek Desarrollo y Gestión Industrial SL emerxe, ademais, como principal accionista de CIE Automotive. Trátase do holding inversor da familia Riberas, a través do cal os irmáns Francisco José e Jon Riberas (presidentes de Gestamp e Gonvarri) articulan as súas inversións e que coa súa participación do 16,1% superan ao 13,7% en mans da Corporación Financiera Alba (a familia March) ou o 10,6% de Elidoza Promocion de Empresas SL.
Un xigante canadiense aterra en Viza
A compra de Maviva por parte de Ferrovial tivo lugar en 2017 e só un ano despois sería a quenda de Viza. A empresa familiar viguesa fundada especializada na fabricación de armaduras para asentos de vehículos foi adquirida polo xigante canadiense Magna, que por aquel entón era o terceiro grupo do mundo en fabricación de compoñentes para a automoción, só por detrás de Bosch e Continental.
O movemento supuxo a integración dos seus 1.200 empregados, así como a absorción de Viza como marca para pasar a operar baixo a enseña de Magna Seating e permitiu que o grupo canadiense reforzase a súa posición no negocio de asentos e estruturas de asento grazas á capilaridade da rede de fábricas de Viza en O Porriño, República Checa, México e Marruecos.
A estas operacións seguiran outras como as vendas das plantas de Plastic Omnium en Vigo ao grupo valenciano Segura, así como da planta que pertencía a Faurecia en O Porriño ao fondo alemán Callista Private Equity. Pola súa banda, Reydel Automotive (con sede en Salceda de Caselas) foi adquirida pola india Motherson Sumi Systems.
Marsan salva o seu ‘match ball’
É por iso que Galicia queda nestes momentos con só dous representantes do sector da automoción con capital 100% autóctono. É o caso de Marsan e Copo. A primeira está especializada en revestimentos superficiais (coating) para automoción, transformación metálica, ensamblaxe de compoñentes e loxística e conta con plantas en Vigo, Zaragoza, Valença do Minho (Portugal), Celaya ou Villagrán (estas dúas últimas sitúanse en México).
Grupo Marsan Sociedade de Carteira, a empresa de cabeceira, articulou o ano pasado unha ampliación de capital mediante a cal evitou a súa entrada en concurso de acredores. Con este movemento deu entrada a un grupo inversor liderado por Luis Álvarez-Sestelo (conselleiro delegado de Optare Solutions), que exerce desde entón como presidente da entidade. Marcos Oubiña More é conselleiro delegado dun Grupo Marsan no cuxo accionariado tamén están presentes Vigo Activo (sociedade de capital risco da Zona Franca de Vigo), que declara unha participación do 27,8%, así como Xesgalicia (xestora de fondos de capital risco da Xunta). Ambas acudiron á ampliación de capital clave do ano pasado.
A expansión de Copo
Xesgalicia ocupa, ademais, un papel destacado no outro gran provedor da automoción que preserva capital galego. Trátase de Copo. Sodiga controla un 7,6% das accións de
Comenta el artículo
