A Xunta reúnese en Ourense co foco nas axudas para os afectados polos incendios.

Quenda para o Consello da Xunta en Ourense. O Goberno galego reunirase de forma extraordinaria este venres na Cidade das Burgas para abordar a concesión de axudas aos damnificados por unha das peores ondas de incendios das últimas décadas.

De acordo coa axencia Europa Press, o obxectivo das axudas que se ultiman é “priorizar” a reconstrución das vivendas habituais de veciñas e veciños que viron os seus fogares afectados ou incluso destruídos polas lapas.

Tamén haberá fondos para a restauración de edificacións que servían como segunda ou terceira residencia. Este esquema lembra ao que se seguiu en 2022, na anterior gran onda de incendios que sufriu Galicia, cando O Courel (Lugo) e Valdeorras (Ourense) foron os territorios máis afectados.

Entón, as axudas da Xunta cubriron o 100% do custo de reparar as casas queimadas, ata 122.000 euros, no caso de primeiras residencias. Se o inmoble destruído correspondíase cunha segunda vivenda, o máximo cuberto foi de 61.200 euros.

Á espera do deseño definitivo destes apoios e das súas contías, que se dará a coñecer este venres, dentro do paquete que proxecta a Xunta tamén se atenderá á restauración das viñas ou granxas afectadas, co obxectivo de que non se retrase a reactivación económica destas zonas.

As fontes consultadas por Europa Press sinalaron que a Xunta realizou ao longo da última semana un diagnóstico “moi pormenorizado, aldea a aldea”, dos danos, aínda que por agora non se fixo pública unha cifra oficial de vivendas e outras edificacións afectadas.

Axudas en paralelo ás do Goberno central

As axudas que aprobará a Xunta serán “plenamente complementarias” coas do Executivo central, tras a declaración das zonas catastróficas. O Goberno galego recalcou que é preciso “axilizar ao máximo” as axudas e, pola súa parte, o propio presidente da Xunta, Alfonso Rueda, avanzou tras acompañar aos Reis, Felipe VI e Letizia, na súa visita a Verín, que o obxectivo é que as galegas se publiquen “xa a partir do sábado” no Diario Oficial de Galicia (DOG) e se poidan comezar a solicitar.

“Sempre o digo: rapidez en convocalas, sinxeleza na tramitación e rapidez en pagalas. Aquí hai xente que perdeu a súa vivenda e que está esperando que a axudemos canto antes e iso é, precisamente, o que queremos facer”, afirmou.

Mentres se celebra este Consello extraordinario, o Pazo do Hórreo, pola súa banda, acollerá un novo debate sobre a crise de incendios deste verán que servirá de previa para o outono político que se aveciña, tendo en conta as duras críticas que BNG e PSdeG, cos seus líderes, Ana Pontón, e José Ramón Gómez Besteiro, á fronte, realizaron sobre a xestión da Xunta.

Pontón pedía este mesmo xoves a dimisión do presidente galego, ao que afeou “incompetencia”. Precisamente, o debate que albergará este venres o Pazo do Hórreo chega motivado por unha petición do BNG, que instou a que a Deputación Permanente -órgano reitor da Cámara en períodos inhábiles- se reúna para ver a posibilidade de urxir un pleno extraordinario polos incendios.

Con independencia do futuro desta petición, que os populares poderán rexeitar se así o consideran coa forza da súa maioría absoluta, a próxima semana arranca de novo o período ordinario de sesións e o primeiro pleno será os días 9 e 10 de setembro. Rueda xa avanzou a súa intención de comparecer, como esixiron en días pasados socialistas e nacionalistas.