Advertencia do Foro Económico: “Galicia necesita máis natalidade e máis poboación en idade de traballar”
González Laxe advirte de que non hai cambios na estrutura produtiva da comunidade polo que esta queda "atrapada nun círculo vicioso"
O Foro Económico de Galicia insiste en que para avanzar economicamente a comunidade necesita máis poboación en idade de traballar. Foto: Eduardo Parra/Europa Press
Comentarios
A economía galega crece, pero faino de forma máis tibia e con problemas de fondo enquistados, como o demográfico. O Foro Económico de Galicia presentou este martes o seu informe de conxuntura socioeconómica do cuarto trimestre de 2025.
Na presentación do informe de conxuntura socioeconómica do cuarto trimestre de 2025, o seu coordinador, Fernando González Laxe, advertiu de que non hai cambios na estrutura produtiva, polo que ve á comunidade “atrapada nun círculo vicioso” ou “trampas do desenvolvemento”.
“Salarios baixos”
Entre outras carencias, sinalou que é unha economía “baseada en salarios baixos” e apuntou que, aínda que a produtividade crece, “ten un lastre”, que é o da poboación.
“Galicia necesita persoas”, subliñou o economista e expresidente da Xunta, quen alertou de que é unha das rexións europeas con maior taxa de envellecemento e menor de natalidade.
Máis envellecemento e menos natalidade
En concreto, a primeira (envellecemento) está no 26,6% en Galicia, fronte ao 21,1% da media europea, mentres que a segunda (natalidade) sitúase no 5 por 1.000, polo 8 por 1.000 da Unión Europea.
Por outra banda, en 90 concellos galegos a masa do que aportan as pensións supera ao conxunto das remuneracións que obteñen as persoas que traballan alí, segundo apuntou Laxe.
Por iso, tanto el como o director do Foro Económico, Santiago Lago, apostaron por “recibir máis” emigración, debido á necesidade de cobertura de postos de traballo, e, aínda sen ter calculado un dato, ambos referíronse á cifra de 3 millóns de habitantes.
Construción contra sector primario
En canto á evolución da economía galega, González Laxe valorou o empuxe de sectores como a construción, a industria manufacturera e as actividades profesionais. Existe un “gran problema”, con todo, en ámbitos como o sector primario.
No apartado do emprego, o tamén economista José Francisco Armesto celebrou datos “tremendamente positivos” e o “dinamismo” no xénero feminino.
