O Foro Económico cre que a reforma de financiamento deixa “mal a Galicia”, que debería recibir 1.000 millóns máis.

O Foro Económico advirte de que a proposta de reforma do sistema de financiamento autonómico deixa “mal, tirando a moi mal” á comunidade, e eleva a 1.000 millóns o que, segundo as súas estimacións, deberían incrementar os recursos para Galicia.

Así se pronunciou o director do Foro Económico de Galicia, Santiago Lago, a preguntas dos medios de comunicación na rolda de prensa de presentación do último informe de conxuntura económica da entidade.

Lago, experto na reforma da financiación

No seu día, a Xunta designou a Lago como o seu representante na comisión de expertos para elaborar un documento sobre a reforma do sistema de financiamento autonómico.

Sen dispor de todos os datos, e falando de números “gordos”, o economista cifrou este martes en 900 ou 1.000 millóns de euros máis os que, ao seu xuízo, deberían chegar á comunidade galega coa reforma proposta polo Goberno central, e non 587.

Por debaixo da media

“Non é o disparate do sistema de concertos, particularmente pernicioso para Galicia (….) pero con esta proposta pasaríamos a estar mal, tirando a moi mal”, valorou.

Neste sentido, incidiu en que o sistema actual trata “razoablemente ben” a Galicia, xa que a sitúa “por riba da media”.

Con todo, coa reforma proposta, “os galegos gañan moito menos que a media”, avisou, e sinalou que “non se sabe que pasa co envellecemento”, pero “parece que perde peso” como factor a ponderar no reparto de recursos.

“Van 10 anos cun modelo caducado”

Así as cousas, Santiago Lago abogou por “esperar” a que se celebre o consello de política fiscal e financeira (CPFF), este mércores, e tamén a ver se o PP presenta a súa propia proposta, “se pode ser concreta”.

Sendo “positivo falar disto dentro do modelo”, o director do Foro lembrou que van “10 anos” cun modelo “caducado” e agora “non vale calquera cambio”. “Se é esta reforma, mellor pasemos e imos á seguinte”, opinou.