Galicia investiu máis de 2.000 millóns en operacións inmobiliarias en Estados Unidos en catro anos.

As inversións galegas en operacións nos Estados Unidos alcanzaron entre 2020 e o primeiro trimestre deste ano os 2.077 millóns de euros. Case a totalidade das inversións centráronse no sector inmobiliario, que ascenderon aos 2.073 millóns sendo o 2022 o exercicio que maior capital concentrou con case 1.260 millóns.

Segundo revelan os datos da Secretaría de Estado de Comercio consultados por Economía Digital Galicia, co estalido da crise sanitaria provocada polo Covid-19 paralizáronse as inversións en solo estadounidense. En concreto, ese ano só se destinaron 16 millóns. Un ano máis tarde esta cifra aumentou ata os 100 millóns.

Importante tamén foron as inversións en operacións inmobiliarias realizadas en 2023, cando se alcanzaron os 561.275 millóns. Un ano máis tarde esta cifra diminuíu un 76% ata os 136.000 euros.

A cifra neste período tamén é inferior á realizada nos cinco anos anteriores, entre 2015 e 2019, cando as inversións en ladrillo en solo estadounidense superaron os 2.600 millóns.

As inversións dos Ortega

Os Ortega son uns dos investidores galegos máis coñecidos no sector inmobiliario en EEUU. A fortuna do fundador de Inditex depende, en grande parte, da multinacional téxtil, da que controla case un 60% do seu capital a través das sociedades Pontegadea Inversiones e Partler. As inversións en ladrillo son outra parte fundamental do seu patrimonio e Estados Unidos segue sendo o seu primeiro mercado inmobiliario en canto a activos e inversión.

A última operación coñecida no país presidido por Donald Trump foi a adquisición a principios de xuño do edificio Veneto Las Olas de Fort Lauderdale. Trátase dunha torre de pisos de luxo de 46 plantas en Fort Lauderdale (Florida) de recente construcción.

A compra pechouse con Related Group, a firma promotora fundada polo empresario arxentino estadounidense Jorge M. Pérez, por 165 millóns de dólares, uns 145 millóns de euros ao cambio.

O 2022 foi un ano especialmente investidor para o holding de Amancio Ortega. O ano do estalido da inflación e a guerra en Ucraína, Pontegadea pechou compras de activos inmobiliarios por valor de 2.700 millóns. Neste exercicio produciuse o seu desembarco no sector da loxística, coa adquisición de sete centros de distribución en Estados Unidos por uns 900 millóns de euros. Tamén se incorporou ao seu portafolio inmobiliario un rañaceos en Nova York por 500 millóns e a torre Kiara, en Seattle, por outros 300 millóns de euros.

Do mesmo xeito que ocorre co seu pai, a fortuna de Sandra Ortega tamén se nutre da participación dun 5% no capital de Inditex e os dividendos que a mesma lle reporta. A outra pata sobre a que se sostén o seu patrimonio procede da aposta polo ladrillo.

Ferrado Inmuebles, a principal división inmobiliaria de Rosp Corunna –o holding inversor da empresaria coruñesa–, inxectou a distintas inmobiliarias máis de 220 millóns para continuar co seu negocio. Entre elas estaba Ferrado Properties, a cabeza do seu negocio inmobiliario en Estados Unidos.

Os administradores da compañía indicaron durante o exercicio que “levaron a cabo achegas monetarias por importe de 144,5 millóns de euros cuxa finalidade foi, fundamentalmente, a adquisición de novos inmobles”. O pasado ano, o grupo de Sandra Ortega comprou un total de catro edificios, dous en Estados Unidos e os outros dous en Alemaña.