Galicia leva unha das seis fábricas europeas de IA cunha inversión de 82 millóns.

• Zebra Brain, a aposta de dúas exdirectivas de Reganosa para facer medrar empresas cunha “IA real”

Santiago de Compostela acollerá, no Centro de Supercomputación de Galicia (Cesga), unha das seis novas fábricas europeas de intelixencia artificial (IA) que estará centrada no ámbito da saúde e contará cunha investimento de 82 millóns de euros.

Así o notificou este venres a Empresa Común de Computación de Altas Prestacións Europea (EuroHPC JU), unha iniciativa conxunta entre a Unión Europea, distintos países e socios privados ante a que a Xunta e o Consello Superior de Investigacións Científicas (CSIC) presentaron o pasado mes de xuño unha candidatura para acoller unha destas infraestruturas.

Usos no ámbito da saúde

Neste contexto, a fábrica estará centrada no ámbito da saúde baixo o nome 1HealthAI, e grazas a ela adquiriranse un novo supercomputador específico para intelixencia artificial e unha plataforma de supercomputación avanzada optimizada para IA experimental e prestaranse servizos de apoio integral a empresas e centros de investigación de maneira gratuíta.

Os principais ámbitos de actuación incluirán a medicina personalizada, o envellecemento saudable, a xestión dos recursos mariños, a biotecnoloxía azul, a agricultura, a gandería, o sector forestal, os alimentos funcionais, os nutracéuticos, o desenvolvemento farmacéutico e de vacinas, entre outros.

Só 13 factorías en Europa

Actualmente hai 13 factorías con sede en 12 países (Alemaña, Austria, Bulgaria, Eslovenia, España, en Barcelona; Finlandia, Francia, Grecia, Italia, Luxemburgo, Polonia e Suecia), ás que se suman agora as novas seis fábricas que veñen de concederse en todo o continente, unha delas en Galicia. Deste xeito, Alemaña, España e Polonia serán os tres únicos países que contan con dúas fábricas de IA no seu territorio, algo que sitúa a Galicia nunha “posición relevante no ámbito das tecnoloxías profundas e biotecnoloxía”.

Para iso, a Comunidade galega logrou captar 65 millóns de euros para o seu sistema de investigación e innovación (41 de fondos europeos e 24 estatais) que a Xunta completará con outros 17 millóns de euros de fondos propios.

“Hito histórico”

Pola súa banda, o conselleiro de Educación, Ciencia, Universidades e Formación Profesional, Román Rodríguez, celebrou este “hito histórico” para Galicia, un proxecto que “a sitúa na élite nas áreas de biotecnoloxía e IA en Europa” e que contará cun “equipamento tecnolóxico dos máis avanzados do mundo”.

Isto, sinalou, “vai posibilitar que os proxectos, tanto en investigación como proxectos vinculados ás empresas privadas no ámbito da biotecnoloxía, no ámbito da saúde e no ámbito da intelixencia artificial poidan desenvolverse e gañar en competitividade”.

O despregue da fábrica, apunta a Xunta, “impulsará a creación e o fortalecemento de startups; mellorará a competitividade das empresas; atraerá talento e creará emprego grazas ao acceso a ferramentas de IA avanzadas”. Ademais, 1HealthAI promoverá desde Galicia a cooperación con outras fábricas de IA europeas que traballen en sectores relacionados ou complementarios.

“España, na vangarda da IA”

Tamén, o Goberno central celebrou a chegada da nova fábrica de IA ao país. Segundo trasladou o Executivo nacional nunha nota de prensa, o ministro para a Transformación Dixital e da Función Pública, Óscar López, valorou que “España ponse á cabeza europea en capacidades tecnolóxicas avanzadas, democratizando o acceso á innovación na intelixencia artificial”.

Así mesmo, a ministra de Ciencia, Innovación e Universidades, Diana Morant, festexou a noticia subliñando o “compromiso” do Goberno pola innovación como “motor de progreso no país”.

“España quere ocupar a vangarda dixital e esta nova fábrica de IA é unha oportunidade para liderar o seu desenvolvemento en Europa”, afirmou.