Alianza entre os reis da cervexa: Hijos de Rivera e Damm loitan nos tribunais fronte á marca “Estrella del Camino”

A Audiencia Provincial de Madrid dálle a razón, a medias, a Hijos de Rivera e Damm na loita contra o rexistro da marca Estrella del Camino. O tribunal deixa sen efecto o rexistro da devandita firma para os produtos incluídos no apartado 33 da clasificación de Niza, isto é, “bebidas alcohólicas, agás cervexas; preparacións alcohólicas para elaborar bebidas”, pero considera válido o rexistro para o resto de produtos solicitados, en concreto, “prendas de vestir, calzado, artigos de sombreirería”.

O caso remóntase a febreiro de 2023 cando se solicita o rexistro de Estrella del Camino. Hijos de Rivera e Damm interpoñen recurso contra devandito rexistro. A empresa galega opóñese ao rexistro das dúas clases de produtos mentres que a catalá só á referida ás bebidas alcohólicas. A Oficina Española de Patentes e Marcas (OEPM) dálles a razón e tomba o rexistro. 

O periplo xudicial

O caso pasa á vía xudicial e os solicitantes do rexistro de Estrella del Camino piden que se anulen as resolucións que estiman os recursos das dúas cervexeiras. Sobre o presentado por Hijos de Rivera o tribunal anula a resolución estimativa concedida pola OEPM posto que o recurso presentado pola compañía “interpuso fóra de prazo e, polo tanto, non debía ser admitido”. 

Segundo se recolle na sentenza, de xuño deste ano, o 1 decembro do 2023 Hijos de Rivera presentou o correspondente formulario normalizado de recurso co que se acompañaba un documento no que se recollía que “as alegacións de sustento da resolución” pola que se rexistraba a marca “poranse de manifesto en data próxima”. Dita documentación foi presentada con data de 25 de decembro do mesmo ano, é dicir, “fóra de prazo para recorrer en alzada a resolución”. 

Na parte da documentación presentada en prazo, só figuraba, explica a Audiencia Provincial, como alegación o “risco de confusión con rexistros prioritarios titularidade da recorrente sen especificar as alegacións xurídicas que fundamentaban a revisión da resolución recorrida e a petición formulada no recurso, que é o que a norma demanda”. É por iso que anula a resolución dictada pola Oficina Española de Patentes que estimaba a oposición de Hijos de Rivera. 

O recurso de Damm

No caso do recurso de Damm si que fai o tribunal un análise da similitude das marcas e do risco de confusión. “Conforme á xurisprudencia do Tribunal de Xustiza, a apreciación global do risco de confusión debe basearse, polo que se refire á similitude gráfica, fonética ou conceptual das marcas en conflito, na impresión de conxunto producida por estas, tendo en conta, en particular, os seus elementos distintivos e dominantes”.

Os demandantes argumentaban o “débil carácter distintivo” do termo “Estrella” e xustificábano na “coexistencia rexistral de numerosas marcas que conteñen dita palabra”, criterio non compartido pola Audiencia Provincial madrileña que consideran que “entre a marca solicitada e as marcas oponentes existe similitude desde o punto de vista fonético e denominativo nun grao que poderiamos cualificar de medio”. E engaden que incluir “del Camino” non achega “unha significación suficientemente diferenciadora”. 

Sobre o risco de confusión, os maxistrados sinalan que segundo a xurisprudencia “o carácter distintivo da marca anterior e, en particular, o seu renome, debe terse en conta para apreciar se a similitude entre os produtos ou os servizos designados polas marcas concernidas é suficiente para xerar risco de confusión”. 

Neste sentido, consideran “axustada a dereito a resolución” da Oficina de Patentes que estima o recurso de Damm na que se “acorda a denegación da marca solicitada”  para todos os produtos da clase 33. 

Con todo iso, a Audiencia Provincial madrileña ratifica a resolución da Unidade de Recursos da OEPM que rexeita o rexistro de Estrella del Camino para “bebidas alcohólicas, agás cervexas, e preparacións alcohólicas para elaborar bebidas” e anula a que impedía o rexistro para “prendas de vestir, calzado, artigos de sombreirería”