Altri fixa data aos seus proxectos estrela en Portugal pero mantén a incógnita con Palas de Rei

Compás de espera en Altri. A compañía portuguesa agarda por novidades sobre unha solicitude de autorización ambiental integrada que se perfila como a última chave do proceso de tramitación dun proxecto que aínda se atopa pendente de definir o seu axuste dentro do marco dos fondos europeos Next Generation.

“O proxecto Gama en Galicia aínda se atopa en proceso de tramitación ambiental e obtención da súa licenza”, adiantou José Soares de Pina, CEO de Altri, durante a presentación dos resultados do segundo trimestre. A compañía pronúnciase así sobre este proxecto que implica unha inversión próxima aos 1.000 millóns de euros para levantar un complexo capaz de producir 250.000 toneladas anuais de polpa de celulosa disolvida (DP) e 60.000 de fibras téxtiles (lyocell).

A espera por Palas de Rei

Este mes de outubro cúmprense catro anos desde que Altri desvelase que era a promotora desta iniciativa que forma parte do grupo selecto de proxectos tractores identificados polo comité de expertos da Xunta como parte do plan de reconstrución económica posterior á crise da Covid-19.

Tras obter a declaración de impacto ambiental favorable o pasado mes de marzo, a compañía enfróntase agora ao desafío do financiamento. Dos 1.000 millóns de euros previstos para a posta en marcha do proxecto en Palas de Rei, Altri aportará 220 millóns en capital privado, mentres que outros 500 millóns correrán a cargo de débeda financeira e os 280 millóns restantes procederán de fondos europeos Next Generation, algo que choca co criterio do Goberno, que lle pechou a porta a este tipo de axudas.

Os outros proxectos de Altri

En medio desta espera que xa se achega aos catro anos, Altri acelera cos seus outros plans de “crecemento e diversificación”. Neste senso, Soares de Pina situou a finais deste ano a finalización do proxecto para a recuperación e valorización de ácido acético e furfural na súa planta de Caima, que ata agora contaba con capacidade para producir 116.000 toneladas anuais de fibras celulósicas DWP.

A factoría de Caima tamén acollerá o primeiro centro de producción industrial de AeoniQ. A compañía que dirixe José Soares de Pina  anunciou esta decisión tras ter alcanzado un acordo para adquirir a participación maioritaria de AeoniQ. A empresa suíza desenvolveu o primeiro filamento celulósico biodegradable do mundo, coa idea de substituír o poliéster e o nailon e ofrecer unhas prestacións similares á das fibras sintéticas, aínda que sen impacto ambiental.

Este movemento implica que Altri tamén se converte en socia da alemá Hugo Boss e de MAS Holdings, o maior fabricante de roupa técnica do sur de Asia, no accionariado da empresa helvética.

En paralelo a este dobre proxecto en Caima, Altri prevé dar comezo no arranque de 2026 ao proceso de “migración” da produción de polpa de madeira BHKP a polpa disolvida DP. A compañía portuguesa investirá 75 millóns de euros neste movemento mediante o cal reorientará a producción da súa fábrica Biotek (ubicada en Vila Velha de Ródão) cara a unha produción de fibras solubles aptas para o seu uso pola industria téxtil.

Altri encara este escenario despois de ter sufrido un recorte de vendas do 29,4%, ata os 169,3 millóns de euros no segundo trimestre do ano. No acumulado deste 2025, a compañía lusa anota uns beneficios por valor de 14 millóns de euros, que contrastan cos 62 millóns alcanzados na primeira metade de 2024. “A mudanza na política comercial de Estados Unidos  levou a un entorno macroeconómico menos favorable, con impacto na demanda global de celulosa”, explicaba a firma na súa presentación de resultados.