Así traballa en Galicia o maior grupo lácteo en España: máis dun milleiro de provedores e 240 millóns en compras

A nivel mundial, Lactalis, o grupo que comercializa marcas como Puleva, Président, El Ventero ou Flor de Esgueva, opera en 150 países, factura máis de 30.000 millóns e conta con 85.000 traballadores. Este xigante do sector lácteo desembarcou en España a través de Galicia, cunha queixería en Vilalba en 1983. Hoxe é o principal operador do mercado, con oito plantas industriais que recollen a 1.400 ganderías. Tamén é o actor de referencia en territorio galego, onde recolle preto de 500 millóns de litros de leite, aproximadamente a metade do seu subministro.

A multinacional da familia Besnier reivindícase como un motor económico e de cohesión territorial na comunidade, onde conta con fábricas en Vilalba e Nadela. O Informe de Responsabilidade Social Corporativa 2025 de Lactalis España destaca que inviu 6,24 millóns de euros na modernización das fábricas galegas, que xeran 340 empregos directos. Con esta inversión, a compañía supera os 42 millóns de euros destinados aos seus centros lucenses durante a última década.

Galicia, orixe e futuro

A contribución da actividade industrial despregase máis alá desas instalacións. Lactalis realizou durante 2025 compras por valor de máis de 240 millóns a 1.047 provedores galegos, entre gandeiros, recolletores, provedores de materias primas e insumos industriais. Esta inxección de capital distribúese por 136 municipios, o que contribúe á cohesión territorial nun momento de elevada preocupación pola despoboación e o envellecemento.

“Galicia representa a orixe da nosa historia en España e continúa sendo un territorio esencial para o noso presente e o noso futuro. O noso compromiso con esta comunidade tradúcese en investimento, emprego, colaboración co sector primario e apoio ao desenvolvemento económico das zonas rurais, xerando valor compartido para as persoas, as ganderías e o conxunto do territorio”, di Javier Pozueta, director da planta de Vilalba.

Case 900 ganderías

Galicia é a gran despensa de leite do Estado. E tamén a de Lactalis. En 2025 recolleu máis de 497 millóns de litros de leite procedentes de 893 ganderías situadas en 128 municipios galegos. O 98,9 % do leite de vaca recollido conta coa certificación de benestar animal Welfair®, un requisito cada vez máis estendido entre a industria láctea.

O grupo desenvolve xunto ao CSIC, a través da Estación Experimental do Zaidín —EEZ-CSIC—, un proxecto orientado a reducir as emisións das ganderías antes de 2030. Tras auditar máis de 1.000 ganderías en toda España, a compañía e o CSIC identificaron 27 medidas concretas para implantar de forma gradual e contribuír á redución de emisións de gases de efecto invernadoiro. O proxecto inclúe un piloto en 16 ganderías, 13 delas en Galicia, con solucións prácticas que poidan trasladarse progresivamente ao conxunto do sector.

O Atlas Galego da Empresa Comprometida 2025

Lactalis, nun comunicado, pon en valor o recoñecemento ao seu desempeño en sustentabilidade por parte do Atlas Galego da Empresa Comprometida 2025, editado por Economía Digital Galicia. O estudo sitúa a compañía entre as empresas mellor valoradas en categorías como o bo goberno, a sustentabilidade, a xestión responsable das persoas e a contribución ao desenvolvemento económico e social do territorio.