Audasa ten máis medo á guerra de Irán que a perder a AP-9: “O prezo do combustible pode moderar o tráfico”

Audasa, a propietaria da AP-9, a autoestrada galega do Atlántico, teme que o conflito en Oriente Medio e a suba que está a provocar no prezo do combustible afecte o seu negocio. De feito, segundo o folleto recentemente publicado dunha emisión de obrigas a dez anos por valor de 66,8 millóns, esta posibilidade parecelle máis plausible que unha hipotética finalización da concesión do vial o que, asegura, lle reportaría en todo caso unha multimillonaria indemnización.

No folleto lanzado ao mercado recentemente para esa emisión de bonos, Audasa explica que “no presente exercicio, a evolución do entorno internacional vese afectada pola intensificación do conflito entre Irán, Estados Unidos e Israel desde finais de febreiro de 2026”. “Esta situación está a xerar incrementos no prezo do petróleo, o que podería moderar o crecemento do tráfico na autoestrada polo encarecemento do combustible”, expón. “Se ben ata a data non se observou que estas variacións afectasen o uso da autoestrada, no caso de prolongarse esta situación de incremento de prezos, o tráfico da autoestrada podería verse afectado”, concede.

Comparación coa crise do ladrillo

A compañía en mans de Itínere ve plausible unha caída de tráficos polo encarecemento dos combustibles e pon como exemplo os retrocesos experimentados durante a crise do ladrillo. “A modo ilustrativo, a crise financeira dos anos 2007-2008 derivada da asunción de riscos excesivos por parte das institucións financeiras estadounidenses e que desatou o colapso da burbulla inmobiliaria, contaxiouse ao sistema financeiro internacional e, como consecuencia diso, desembocou nunha crise económica a escala internacional, a cal tivo o seu efecto negativo nos tráficos das autoestradas, entre elas en Audasa.

Así, apunta que no ano 2007, a IMD (Intensidade Media de Tráfico) da autoestrada creceu un 7,5% para, posteriormente e ata 2014, cando comezou a recuperarse, caer un 1%, un 2%, outro 1%, un 6,5%, un 12,48% e un 6,43%, respectivamente.

“No caso de que a actividade de Audasa puidese verse afectada de forma directa por riscos desta natureza, levaríase a cabo unha análise exhaustiva das súas implicacións en todas as áreas”, expón a compañía.

Sen novas de Europa

Doutra banda, no folleto, a compañía que explota a AP-9 insiste en que non ten coñecemento das actuacións que desenvolve Europa respecto á revisión da súa concesión nin a Comisión Europea se puxo en contacto con ela.

Foi o pasado xullo cando a Comisión Europea deu un ultimato ao Goberno central para emendar as irregularidades que, ao seu xuízo, se produciron nos procesos de prórroga das concesións de explotación da AP-9 e a asturiana A-66, tamén do grupo Itínere. Segundo Bruxelas, vulneraron regras da UE en materia de contratación pública e de concesión de autoestradas e se o asunto non se resolvía no prazo de dous meses, os servizos comunitarios poderían elevar o asunto ao TJUE, o Tribunal de Xustiza Europeo. A compañía asegura estar completamente ao marxe dese proceso.“Segundo as informacións publicadas, España tería contestado nos dous meses seguintes a dito ditame mantendo a regularidade e legalidade do actuado”, apunta. “Audasa non recibiu ningunha notificación respecto das dúas cartas de emplazamento, nin é parte no procedemento que se puidese desenvolver”, engade.

Insiste Audasa ademais en minimizar o risco dun hipotético rescate da autoestrada por parte do Goberno, unha posibilidade que, en todo caso, sempre rexeitou o ministro Óscar Puente. “O rescate da concesión requerirá ademais, conforme á lexislación vixente, a acreditación de que dita xestión directa é máis eficaz e eficiente que a concesional. Nos supostos de resolución por causa imputable á Administración, esta abonará ao concesionario, en todo caso, unha compensación”, expón, para lembrar, como fixo noutras ocasións que, ante calquera modificación ou extinción do contrato de concesión, tería dereito a ser “debidamente compensada e indemnizada”, por unha cantidade que, ao seu xuízo, “sería significativamente superior ao importe actual da súa débeda”, que a finais do ano pasado superaba os 1.052 millóns.