Bershka, Stradivarius e Oysho lideran o crecemento de Inditex en vendas e Pull&Bear retrocede en beneficios
Zara, a cadea estrela, incrementou a súa cifra de negocio preto dun 1%, aínda que con 28.051 millóns de euros representa máis do 70% das vendas da multinacional.
Vista da tenda de Pull&Bear no centro comercial Gulliver da capital ucraína, Kiev. EFE/Marcel Gascón
Comentarios
Inditex crece e diversifica a orixe dos seus beneficios. Non todo é xa Zara na multinacional de Arteixo e iso é algo que se nota nos resultados de 2025 onde, en liña coa tendencia ascendente do 2024, Bershka, Stradivarius e Oysho marcaron os maiores avances porcentuais en canto a vendas e beneficios antes de impostos, situándose Pull&Bear na outra cara da moeda.
Segundo a información remitida a mañá deste mércores á CNMV, no exercicio 2025, Zara, ademais de Zara Home e Lefties, acumulou unhas vendas de 28.051 millóns de euros, case un 1% máis respecto a 2024. O peso da enseña estrela do grupo representa algo máis do 70% da cifra de negocio total, de 39.864 millóns de euros.
Vendas
Pull&Bear, con 2.546 millóns, anotou unha evolución nas vendas dun 3,1%, en liña con Massimo Dutti, que creceu un 3% con 2.019 millóns de euros. Non obstante, Bershka, Stradivarius e Oysho anotaron incrementos de dobre díxito.
A cadea de moda nova estirou as súas vendas un 12%, ata os 3.286 millóns, mentres que Stradivarius fíxoo un 12,6%, pechando o exercicio en 3.002 millóns. Oysho pasou de 831 a 960 millóns de euros, un 15% máis.
Beneficio antes de impostos
A compañía tamén trasladou o beneficio antes de impostos alcanzado polas súas distintas enseñas. Pull&Bear, con base de operacións en Narón, foi a única que viu decrecer os seus beneficios. En concreto, un 7,8%, ao pasar o seu resultado de 458 a 422 millóns.
Tamén neste apartado, os maiores avances porcentuais anotáronos Bershka, Stradivarius e Oysho, con evolucións de case un 20%, un 14,7% e un 35% respectivamente. O BEI das cadeas alcanzou os 657, 797 e 198 millóns de euros.
Zara, en calquera caso, segue sendo o motor indiscutible de beneficios, aínda que o seu ritmo de crecemento sexa máis moderado. De un resultado de 5.407 millóns de euros pasou a 5.601 millóns, un 3,6% máis, mentres que Massimo Dutti incrementou resultado nun 7,9%, ata os 434 millóns.
Retornos por capital
Os maiores retornos por capital empregado en cada marca tamén lévanos as cadeas máis novas. No caso de Stradivarius é dun 72% mentres que Oysho queda nun 63%. Segue, neste caso, Massimo Dutti, cun 56%, un 50% de Bershka, un 40% de Pull e un 36% de Zara.
Neste caso, de todas as marcas da compañía, Pull foi a única que viu como diminuía o seu retorno no pasado exercicio, que en 2024 alcanzaba o 48%.
Inditex rexistrou un beneficio neto récord de 6.220 millóns de euros no seu exercicio fiscal 2025-2026 (desde o 1 de febreiro de 2025 ao 31 de xaneiro de 2026), o cuarto de Marta Ortega á fronte da presidencia, o que supón un incremento do 6% respecto ao ano anterior, segundo informou a compañía, que elevará o dividendo un 4,1%, ata 1,75 euros por acción.
As vendas alcanzaron os 39.864 millóns de euros, un 3,2% máis sobre 2024, cunha evolución “moi satisfactoria” tanto en tenda como ‘online’, positiva en todos os formatos e, a tipo de cambio constante, en todas as zonas xeográficas. As vendas a tipo de cambio constante creceron un 7%.
