KKR, Atitlan, Driza… Novos operadores loitan por entrar en Galicia no medio do bloqueo eólico

O último informe da Asociación Empresarial Eólica, a patronal española do sector, sitúa a Galicia como a cuarta comunidade do Estado con maior potencia instalada, 3.920 megavatios, ao peche de 2024 e a cuarta en xeración, pois concentrou o 14,5% da enerxía producida no Estado a partir do vento, con 8.636 GWh. A pesar das boas cifras en canto a contribución ao PIB e ao emprego, Galicia foi descolgándose dos postos de cabeza debido ao menor ritmo de instalación de parques en comparación con outros territorios como Castela e León, Aragón, Castela-A Mancha ou incluso Andalucía. A situación xudicial que atravesa o sector, con máis de 80 proxectos paralizados polo risco ambiental que conlevaría a súa construción, é unha peza clave do frenazo e o principal obstáculo, aínda que non o único, que identifican os promotores á hora de mobilizar investimentos.

Malia ao complicado escenario, que se nutre da falta de consenso social sobre os proxectos, ao territorio galego chegaron novos operadores que queren comezar a producir enerxía eólica. Empresas como Driza ou Galenergy, fondos como Atitlan ou promotoras de forte músculo financeiro como Greenvolt, que ten detrás á xestora norteamericana KKR, puxeron sobre a mesa máis de 1.000 megavatios para instalar, aínda que algúns deles xa foron rexeitados ou atópanse paralizados no TSXG. Por agora, a aspiración de sumarse aos grandes actores do sector, como Iberdrola, Endesa, Acciona ou Naturgy está en proceso de tramitación.

KKR mira a Ourense

V-Ridium, unha filial da portuguesa Greenvolt, presentou ante o Ministerio para a Transición Ecolóxica tres parques eólicos en A Limia de 118, 112 e 92 megavatios. En conxunto sumarían, por tanto, 320 megavatios, o que situaría á empresa entre os grandes operadores da comunidade. Greenvolt foi, no seu momento, a división de renovables do grupo de Altri, pero tras a desinversión planificada da papeleira que pretende construír unha fábrica de fibras téxtiles en Palas de Rei, a compañía caeu en mans do fondo norteamericano KKR.

Os tres parques están aínda no rexistro do Ministerio sen que conste unha valoración favorable ou desfavorable á súa construción, é dicir, en proceso de tramitación.

Atitlan e os ‘dinoparques’

O fondo Atitlan, fundado por Roberto Centeno, xenro de Juan Roig, recibiu recentemente a negativa do Executivo ao parque eólico As Fenteiras, nos concellos de A Cañiza e Covelo, e cunha potencia de 62,79 megavatios. Pero non é o único proxecto que ten en marcha en Galicia. A través das filiais Fukiraptor, Galveosaurus e Dakoraptor  puxo sobre a mesa uns 170 millóns de investimento para instalar 40 aeroxeradores en A Estrada, Campo Lameiro e Cercedo-Cotobade.

As xurásicas promotoras pretenden levantar o parque Chamarrapio, de 53,79 megavatios; o Alamoceiros, de 64,5 megavatios; e o Xubrintas, de case 62 megavatios.

Máis de 250 millóns de investimento de Driza

A vallisoletana Driza tamén quere comezar a operar en Galicia, onde o recurso é especialmente apto para o bo rendemento dos aeroxeradores. E a súa posta en escena é de obra grande. Plantea construír cinco parques que suman algo máis de 290 megavatios, o que conlevaría máis de 250 millóns de investimento. Trátase dos proxectos Agromaces (60,67 MW), Ventoburgo (59,85 MW), Sistesas (55,92 MW), Xestiloi (58,31 MW) e Agratina (56,24 MW). Os proxectos repártense entre as provincias de Pontevedra, Lugo e Ourense.