O fundador de Aldealista: «Nacemos como un Tinder de aldeas»
O fundador e CEO da startup galega, Juan Carlos Pérez, recomenda aos emprendedores que teñan "resiliencia", porque van recibir "máis nos que síes", e que conten cun plan de negocio antes de buscar investidores.
Alfredo Ramos, consejero de APD Noroeste y director en Galicia de R y MasOrange, mantuvo una conversación con Alba Budiño, cofundadora de Zebra Brain, y Juan Carlos Pérez, fundador de Aldealista durante el I Gran Foro de Innovación y Emprendimiento organizado por APD / R Cable
Comentarios
Máis dunha trintena de relatores e preto de 400 profesionais asistiron este martes ao I Gran Foro de Innovación e Emprendemento organizado por APD en Santiago, un ambiente bulicioso e de intercambio de ideas que, á súa maneira, reproducía no amplo espazo do Palacio de Congresos e Exposicións o perseguido ecosistema innovador que é clave para a competitividade dunha economía. A proposta de APD estruturouse en sete mesas de diálogo e unha conferencia final de Bisila Bokoko, directora executiva de BBES, quen a través das súas vivencias persoais motivou aos presentes para afrontar os desafíos con propósito e visión global.
O percorrido das intervencións permitiu coñecer desde as alternativas de financiamento ata a necesidade das grandes empresas en contar co respaldo de startups altamente especializadas, ou o efecto positivo dunha innovación aberta que xermina en colaboracións produtivas entre compañías, algo que agora parece natural cando hai uns anos parecía inverosímil.
Innovación de impacto e cohesión territorial
Na xornada tamén se analizou o impacto da innovación no territorio e a súa contribución para combater a despoboación. Foi nunha conversa conducida por Alfredo Ramos, conselleiro de APD Noroeste e director en Galicia de R e MasOrange, con Alba Budiño, cofundadora de Zebra Brain, e Juan Carlos Pérez, fundador de Aldealista. Zebra Brain representa unha innovación de impacto, pois utiliza a intelixencia artificial para a transformación organizativa das empresas. Creada por dúas exdirectivas de Reganosa –a Budiño, antiga encargada de Xestión do Talento, súmase Rocío Vega, na súa vez responsable de Dixitalización e Eficiencia Enerxética da regasificadora– a empresa pretende brindar solucións estratéxicas que faciliten escalar o negocio e, en consecuencia, impulsar o crecemento e a fortaleza das empresas.
Aldealista, pola súa banda, viña de gañar a Impact Social Cup, un relevante recoñecemento sobre o impacto positivo en España, e representou a contribución da innovación á cohesión territorial. “Nacemos como un Tinder de aldeas“, resumiu o seu fundador e CEO Juan Carlos Pérez, un emprendedor que naceu na emigración, en Suíza, que traballou en Noruega e que estende as súas ramas familiares por Barcelona ou Panamá. A súa historia vital ten moito que ver coa súa empresa, pois foi a súa avoa, antes de falecer, quen lle pediu que, xa que desenvolvía proxectos polo mundo, fixese tamén algo pola aldea onde a familia ten as súas raíces. Así naceu Aldealista en San Xoán de Río.
Ser resiliente, ter un propósito e facer un plan de negocio
“Emprender non é sinxelo, neste país tampouco”, afirmou Juan Carlos Pérez, que recomendou a quen emprenda esa aventura “ter propósito” e “ser moi resilientes”, porque van atopar moitos obstáculos e “máis nones que síes”. Desexou para os emprendedores que “non teñan medo ao fracaso nin os sinalamos por non ter éxito”; e recomendoulles contar con “un plan de negocio” antes de buscar investidores.
A súa empresa, o Tinder de aldeas, funciona como un catálogo de imaxes de aldeas, que se suma a información útil sobre servizos ou lugares de interese, co que Aldealista pretende “facer visible o invisible”, en palabras do fundador. Tamén busca poñer en contacto ese espazo rural, xeralmente desapercibido, co mundo urbano, para ver se fan match.
Para o desenvolvemento da startup, con presenza en 50 países, o fundador desvelou que contou co respaldo de empresas como Hijos de Rivera, Abanca ou Lence. Tamén destacou a importancia de colaborar con despachos de arquitectura ou co Observatorio de Arquitectura Saludable para recuperar os espazos do abandono. “Hay que darse una vuelta por el interior de Lugo y Ourense para ver el patrimonio a conservar“, sinalou Juan Carlos Pérez.
