Rueda celebra a inversión de SAIC: “Está chamada a transformar o futuro industrial de Galicia”
O presidente da Xunta considera que o investimento de SAIC Motor en Ferrol para a posta en marcha da súa primeira fábrica en solo europeo fará de Galicia “un dos polos de automoción máis importantes de Europa".
El alcalde de Ferrol, José Manuel Rey Varela; el vicepresidente de SAIC, Wu Bing; el presidente de la Xunta, Alfonso Rueda; la conselleira de Industria, María Jesús Lorenzana, y el alcalde de As Pontes, Valentín González Formoso, en el acto de recepción oficial de los primeros coches de MG en el puerto de Ferrol. Foto: Xunta
Comentarios
Alfonso Rueda estende a man a SAIC Motor ante o seu desembarco en Galicia. O líder da Xunta de Galicia presidiu este xoves o acto de recepción do primeiro buque portavehículos de SAIC Motor a través da súa filial loxística, Anji Logistics.
Durante a súa intervención, Rueda defendeu que se trata dun “día moi importante” e que “ten que ser o principio de moitas cousas para os próximos anos”. “É a primeira imaxe visible dun proxecto industrial de longo percorrido que está chamado a transformar o futuro industrial de Galicia”, destacou.
Acompañado do vicepresidente de SAIC Motor, Wu Bing, e autoridades como o alcalde de Ferrol, José Manuel Rey Varela, a conselleira de Economía e Industria, María Jesús Lorenzana, ou o presidente da Deputación da Coruña, Valentín González Formoso, Rueda asegurou que coa recepción deste primeiro barco “chega unha decisión de futuro para Galicia”.
“Estes coches representan a vontade de crear unha relación duradeira entre unha das maiores empresas automobilísticas do mundo e Galicia, unha terra que abraza a industria e as súas oportunidades”, precisou.
O atractivo industrial de Galicia
Ao seu xuízo, “cando unha empresa do tamaño e da importancia de SAIC acaba decidíndose por desenvolver o seu proxecto en Galicia, esa decisión ten un enorme valor. Significa estabilidade, capacidade industriais, loxística e talento”.
“Estou seguro de que todo isto é o que buscou SAIC á hora de tomar esta decisión. Aquí facemos as cousas ben e co selo de Galicia Calidade. SAIC valorou que temos un porto exterior con capacidade para operar cos maiores barcos do mundo, experiencia industrial, capital humano, capacidade para formar a máis persoas e capacidades loxísticas”, reivindicou.
O mandatario autonómico agradeceu o trato recibido en China durante a viaxe institucional de abril na que se deu o paso case definitivo para asegurar esta inversión de 200 millóns de euros e puxo en valor o labor de dous nomes propios: a consignataria Pérez Torres e o equipo da conselleira María Jesús Lorenzana, “que traballaron e seguen traballando para que todo o que está por vir se faga realidade”.
Agradecemento ao Goberno central
Rueda destacou tamén a fluída colaboración coa administración central á hora de materializar esta inversión e puxo o foco na achega clave que suporá SAIC Motor á comarca de Ferrolterra. “Ferrol coñece como poucas cidades en Europa o valor e o significado da industria. Sabe o que supón telo e perdelo. É un proxecto para Ferrolterra, pero tamén para toda Galicia. Vai consolidarnos como un dos polos de automoción máis importantes de Europa”, subliñou.
Nesta liña, Rueda desvelou que desde o grupo chinés se valoraron “moitas alternativas” para a posta en marcha da súa primeira fábrica en Europa e que ao final decidiron por Galicia. “Podo asegurar que aquí van atopar o que decantou a súa decisión”, prometeu, antes de referirse ás capacidades industriais, loxísticas das que dispón a comunidade, así como á existencia de universidades e centros tecnolóxicos de primeiro nivel con profesionais altamente cualificados.
“Unha sociedade civil de Ferrolterra e Galicia que saben recibir e agradecer a quen veñen dispostos a investir. Aquí sentiranse moi a gusto. A Xunta fará todo o posible para que esta relación sexa duradeira e beneficiosa para ambas as dúas partes”, concluíu Alfonso Rueda.
