SAIC, o xigante chinés co que negocia Rueda, prefire España antes que Hungría para a súa fábrica en Europa

• Rueda defende o «dereito» do PP galego a gobernar en Lugo por ser «a lista máis votada»
• Rueda abre a porta ao regreso do exconselleiro Villares: "É moi recuperable para a vida pública"

A planta que o xigante chinés da automoción SAIC quere poñer en marcha en Europa está máis preto de Galicia. Un día despois de que o presidente da Xunta, Alfonso Rueda, se reunise cun equipo directivo do grupo propietario dos automóbiles MG, Bloomberg asegura que o conglomerado tería escollido España fronte a Hungría como territorio no que ubicar a súa factoría.

Bloomberg, que cita fontes coñecedoras das negociacións, asegura que SAIC desexa ubicar unha das súas factorías en Europa, como moitos outros fabricantes chineses, para reducir o impacto no seu negocio dos aranceis da UE. Indica, non obstante, que aínda que a decisión aínda non está pechada, si que planea que a factoría se estableza en España. “A decisión aínda non se tomou e están definíndose detalles clave, como o importe da inversión, a capacidade de produción e o cronograma, que podería sufrir modificacións”, expón.

Sen acordo pechado

Que Hungría quedase fóra das quinielas de SAIC dá máis oportunidades a Galicia para quedar coa fábrica. Entre outras ubicacións, a compañía sondea a Plisan, a plataforma loxística de Salvaterra-As Neves.

Tras a reunión con SAIC, na que tamén participou a conselleira de Industria, María Jesús Lorenzana, Rueda indicou que non pecharan ningún acordo. “O que viñemos é a ofrecer e a contar en persoa as posibilidades que ten Galicia para calquera actividade que teña que ver coa automoción”.

BYD

No pasado, outro grupo chinés da automoción, BYD, tamén explorou Galicia para erguer dúas fábricas, aínda que finalmente estas foron a Hungría e a Turquía.

A finais do ano pasado, Reuters avanzou que BYD volvía mirar a España para construír unha terceira planta.