Luz verde a dous parques eólicos que abastecerán a Ferroatlántica e darán descontos aos veciños da zona

O Consello da Xunta de Galicia autorizou este luns os dous primeiros parques eólicos ao abeiro da nova Lei de Recursos Naturais de Galicia, que recolle que estas instalacións terán que ter un impacto “positivo” na zona onde se desenvolven, incluíndo, entre outros, descontos nas facturas da luz dos cidadáns.

En concreto, o Goberno galego aprobou os parques eólicos de Baro e Greco, que suporán unha inversión de uns 15 millóns de euros para subministrar enerxía limpa á fábrica de Ferroatlántica de Sabón (A Coruña). Os dous están promovidos por Villar Mir Energía.

O primeiro deles estará ubicado nos concellos de Mondoñedo, Lourenzá, Castro de Rei, Pol, Riotorto, A Pastoriza e Meira. Pola súa banda, O Greco construirase nas localidades de Cerdedo-Cotobade, Ponte Caldelas, A Lama, Fornelos de Montes, A Cañiza, Cobelo, Avión, Melón, Carballeda de Avia e Allaríz.

Medidas sociais por 15 millóns

Segundo explicou a conselleira de Economía e Industria, María Jesús Lorenzana, a primeira novidade que supón a autorización destes parques é que o 80% da súa enerxía irá parar á industria galega. En concreto, á factoría de Sabón previamente referida.

Ademais, sumados aos “beneficios directos” da súa construción, cunha inversión de 163 millóns e 500 postos de traballo e 25 empregos fixos ao seu termo, estes parques deberán desenvolver unha serie de medidas sociais que se cuantifican en máis de 15 millóns de euros.

Redución factura da luz

Lorenzana apuntou que estas iniciativas irán destinadas a distintos bloques temáticos, como a mellora da calidade de vida dos cidadáns das localidades onde están os parques coa redución do custo da factura da luz en ata un 30% ou un desconto do 20% na instalación de placas solares nas súas vivendas.

Tamén se lles dará a posibilidade de participar no capital do proxecto con entre 5.000 e 50.000 euros, garantindo un interese anual dun 5% sobre o capital investido.