O PSOE galego rebélase contra a Xunta polo seu "modelo improvisado" de minería.

O PSdeG eleva o ton contra a Xunta de Galicia a conta da minoría. A súa deputada autonómica, Patricia Iglesias, cargou este domingo contra o que definiu como “modelo improvisado” para a xestión destes recursos.

Iglesias avanzou o rexistro de iniciativas parlamentarias para esixir explicacións sobre as “irregularidades” que rodean a diferentes explotacións. “A Xunta fala de minería estratéxica, pero o que practica é minería sen plan nin control e chea de irregularidades que acaban nos tribunais”, censurou nun audio remitido aos medios, no que salientou que o seu partido “non está en contra” desta actividade industrial, senón do modelo autonómico actual.

Neste sentido, Iglesias censurou que Galicia segue sen un Plan Sectorial de Minas aprobado, o que sinalou como un “deber legal”, e que, mentres, o Goberno galego continúa autorizando proxectos “a golpe de expediente, sen regras claras e cunha sucesión de problemas que acaban nos tribunais”.

A continuación, a deputada autonómica do PSdeG casos como os dos xacementos de Penouta, San Finx, A Gudiña e Touro-O Pino, que ao seu xuízo mostran un “patrón común”, que consiste en “autorizacións cuestionadas, deficiente control ambiental, inseguridade xurídica e consecuencias directas para o territorio e para as persoas”.

Patricia Iglesias tamén puxo o foco na “falta de transparencia” e nos “posibles conflitos de intereses” en informes técnicos utilizados para impulsar explotacións mineiras, así como na ausencia de avaliacións ambientais “completas” en proxectos de alto impacto. “Cando é a xustiza quen ten que poñer orde, é porque a Administración non está facendo o seu traballo”, advertiu.

É por iso que a deputada socialista anunciou o rexistro de varias iniciativas no Parlamento de Galicia para reclamar información detallada sobre estes procedementos; garantir o cumprimento estrito da legalidade ambiental, e aclarar por que Galicia segue sen un marco de planificación mineira.