Ofensiva de CC OO para que Navantia retome a construción naval na antiga Astano
O sindicato presentou a súa proposta para o plan industrial 2025-29 e aposta por recuperar a construción naval en Fene co obxectivo de diversificar a súa actividade máis alá das enerxías renovables.
Xaquetas para eólica mariña no estaleiro de Navantia en Fene / Navantia
Comentarios
Comisións Obreiras pon deberes a Navantia. A sección sindical de CCOO no estaleiro de Fene aposta por diversificar a súa actividade máis aló das enerxías renovables e reclamou a volta á construción naval, así como un plan de emprego que asegure o futuro da planta.
O sindicato presentou a súa proposta para un plan industrial 2025-2029 co que busca un retorno aos orixes. E é que Comisións Obreiras alerta da, ao seu xuizo, crítica situación que afronta o estaleiro, cunha previsión de falta de carga de traballo para este ano 2026 e un escenario internacional complexo que dificulta a captación de novos proxectos.
É por iso que defende que Fene non debe limitarse exclusivamente ao sector da eólica mariña. Así, o plan aposta por retomar a construción naval, diversificando a produción cara a sistemas tubulares e bloques en liña. O obxectivo pasa por recuperar a condición das antigas instalacións de Astano como baluarte na construción naval civil (petroleiros, por exemplo).
A folla de ruta de CC OO
Entre os investimentos clave propostos, destaca a recuperación do taller de bloques planos con maquinaria automatizada e a modernización dos dous diques actuais para permitir tanto a nova construción como a reparación de buques, mencionando especificamente o mercado dos gaseros. Un dos piares fundamentais da proposta é a drástica redución da dependencia da industria auxiliar.
O obxectivo sindical é situarse a subcontratación estrutural entre o 30% e o 35%, recuperando servizos que actualmente están externalizados. Para iso, o sindicato detalla necesidades de persoal en áreas críticas, en enxeñería e oficina técnica, coa creación dun equipo propio para CAD, cálculos estruturais e electricidade.
Na área de produción, a organización aposta pola incorporación de persoal de montaxe, caldeiraría e soldadura para garantir o control directo da calidade, ademais do reforzo dos equipos de contraincendios e prevención de riscos para dar cobertura as 24 horas, ademais da contratación dun médico de plantilla, sinalando que Fene é o único centro de produción sen médico propio.
En paralelo, Comisións Obreiras tamén resalta a necesidade dun mantemento técnico permanente para unha factoría que supera os 690.000 metros cadrados. Así mesmo, propón aproveitar as reformas nos edificios existentes para implementar sistemas de enerxía renovable, aliñando o estaleiro cos estándares actuais de sostibilidade.
O sindicato urxe á dirección de Navantia a negociar estas medidas para garantir que o centro non quede infrautilizado e poida desenvolver todo o seu potencial profesional e industrial e conclúe cun alegato: “Sen persoas non hai prazos. Sen emprego propio non hai industria”.
