O Goberno declara zonas catastróficas en todas as comunidades agás Euskadi.

O Goberno acordou no Consello de Ministros celebrado este martes, 26 de agosto, a declaración de “zonas afectadas por emerxencia” territorios correspondentes a 16 comunidades autónomas, coa única excepción de Euskadi. Trátase de territorios que sufriron as consecuencias dos 113 incendios e as cinco danas producidas entre o 23 de xuño e o 25 de agosto. 

“Aínda que o episodio de emerxencia non concluíu, é evidente que estamos ante unha das maiores catástrofes medioambientais dos últimos anos e que os danos persoais en infraestruturas e en bens públicos e privados, sen dúbida algunha, son elevados”, explicou en rolda de prensa o ministro do Interior, Fernando Grande-Marlaska, tras a reunión do Consello de Ministros.

Marlaska destacou a importancia de abrir o mecanismo de axuda para os damnificados “canto antes para que poidan recuperar certa normalidade”, pero incidiu en alusión aos incendios que a “emerxencia aínda non se deu por pechada”. “Estas institucións van ter en todo momento ao seu lado ao seu Goberno e van ter todas as axudas necesarias para conseguir a maior recuperación posible das zonas afectadas pola catástrofe”, garantiu o ministro.

A declaración de emerxencia afecta aos territorios afectados polas tres ondas de incendios rexistrados este verán, a primeira a finais de xuño, a segunda o 7 de xullo e a terceira, que se iniciou o pasado 8 de agosto e na que aínda permanecen activos varios focos. Marlaska lembrou que a última coincidiu coa “ola de calor máis intensa desde que hai rexistros cunha temperatura media superior aos 4,6 graos ao que é habitual nesta época do ano e sendo a máis longa deste período”.

O ministro repasou os medios e recursos mobilizados polo Goberno para facer fronte á última onda de incendios e garantiu que “as institucións van ter en todo momento ao seu lado ao Goberno e van ter todas as axudas necesarias para a maior recuperación posible das zonas afectadas pola catástrofe”.

Asimesmo, trasladou ás familias das persoas falecidas as súas condolencias e o recoñecemento “aos miles de homes e mulleres que están a traballar nunha situación que, dada a duración desta emerxencia, chegan ao esgotamento, á extenuación pero que seguen aí ata o final”, en alusión a efectivos de bombeiros forestais, UME, axentes medioambientais, Protección Civil, policías locais, Exército, Garda Civil, Policía Nacional e voluntarios, entre outros.