Rueda pide manter á UME en Ourense para evitar un rebrote dos incendios.

Alfonso Rueda destacou este venres que a onda de incendios que asolan Ourense “segue evolucionando de maneira positiva” e pide ao Goberno que, malia o plan de desescalada, se manteñan os efectivos da Unidade Militar de Emerxencias (UME) e reforcen medios para outras tarefas posteriores á extinción.

Así o apuntou o presidente da Xunta nunha visita a unha das adegas da Denominación de Orixe (DO) Monterrei realizada este venres, na que demandou ao Executivo central manter aos efectivos da UME “para que a boa evolución non se torza” e máis medios que “deiten unha man” para a recuperación e limpeza das zonas afectadas.

Estabilizar incendios

A Xunta prevé que, ao longo deste venres, “algún” dos cinco incendios activos en Ourense se “poida dar por estabilizado”, pero, segundo lembra Rueda, é necesario “non baixar a garda” ante a nova alza das temperaturas este fin de semana.

O Goberno autonómico dirixiuse ao ministro do Interior, Fernando Grande-Marlaska, para, “entendendo que se ten que producir unha desescalada da UME”, pedir “aguantar un par de días máis” fronte ao fin de semana para que “a boa evolución non se torza” ou, de ser así, “ter os medios aquí para poder reaccionar”.

Rueda pide, tamén, que “o exército deite unha man” durante estes días para labores de recuperación ante as peticións dos municipios e poder, así, “ter máis medios” nunha labor, di, “moi importante”.

“Seguimos nese proceso de avaliación global dos danos para poder lanzar xa as axudas a semana que vén”, argumentou, antes de lembrar que está previsto celebrar unha reunión do seu Goberno en Ourense co obxectivo de que “as persoas damnificadas” poidan pedir “xa” as axudas.