O franquiciado de Inditex en Israel pecha de forma temporal as súas tendas

O franquiciado de Inditex en Israel optou por pechar temporalmente as tendas que opera no país, segundo se indica nas distintas páxinas web das marcas da multinacional galega con presenza no territorio. Ao peche do exercicio 2024-2025, último do que por agora hai datos completos, o grupo de Marta Ortega e Óscar García Maceiras contaba con 82 establecementos: 25 de Zara, 23 de Pull&Bear, 2 de Massimo Dutti, 14 de Bershka, 15 de Stradivarius e 3 de Zara Home.

Inditex opera no país baixo réxime de franquía polo que a decisión de apertura ou peche dos seus establecementos é decisión, neste caso, do grupo Trimera Brands. Na páxina de Zara Israel indícase: “As nosas tendas permanecerán pechadas temporalmente. As compras en liña estarán dispoñibles e o prazo de devolución ampliarase ata 30 días desde a reapertura das nosas tendas”.

Segundo puido comprobar Economía Digital Galicia, tamén hai anuncios similares nas webs de Massimo Dutti e Bershka no país hebreo, nas que se especifica o mesmo, que os establecementos permanecerán pechados “temporalmente”. Nos localizadores de tendas de Zara Home e Oysho tamén se indica que os puntos de venda están pechados neste momento.

Aínda que non se indica o motivo, todo fai indicar que o franquiciado de Inditex estaría atendendo a solicitude feita polas autoridades locais nun momento de escalada do conflito de Oriente Medio, despois de que o pasado fin de semana Israel e Estados Unidos iniciasen unha ofensiva bélica contra Irán.

Non é a primeira vez que o franquiciado de Inditex toma a decisión de pechar temporalmente os seus establecementos. En outubro de 2023, ao desatarse o conflito armado sobre Gaza, Inditex informou do peche temporal das súas tendas no país. Explicou entón que o seu franquiciado “informou aos clientes do peche das tendas a través das páxinas web das nosas marcas”.

Franquías en Oriente Medio

A matriz de Zara opera en Oriente Medio en réxime de franquía. En Israel faino con Trimera Brands, o propietario da marca Gottex liderada por Joey Schwebel. Nos últimos anos o seu socio xeroulle problemas reputacionais debido á súa proximidade co Goberno israelí e aos ataques sobre Gaza. O pasado verán, por exemplo, o Comité Nacional Palestino de BDS (BCN polas súas siglas en inglés), lanzou unha campaña de boicote a Zara, á que acusaba de complicidade con Israel.

Ademais das 82 tendas en Israel, Inditex tamén sumaba, ao peche do exercicio 2024-2025, 77 en Emiratos Árabes e 167 en Arabia Saudí, os seus principais mercados na zona; 16 en Baréin, 36 en Qatar, outras 33 en Kuwait, 18 en Xordania e 8 en Omán. O pasado ano, ademais, iniciou o seu desembarco en Iraq.

En todos estes territorios traballa baixo a fórmula da franquía, aínda que con outros socios como a libanesa Azadea Group e Cenobi, anteriormente coñecida como Alhokair, de Arabia Saudí. De momento, nas webs de Zara no resto de países de Oriente Medio non hai ningunha advertencia sobre a situación das súas tendas.

Freno á sangría na bolsa

Aínda que a situación de Inditex en Oriente Medio é moi distinta á que tiña en Rusia, de onde saíu en 2022 con máis de 500 tendas e onde non traballaba en franquía, o mercado castigou duramente á téxtil na bolsa durante as dúas primeiras xornadas da semana, en liña en todo caso co resto de valores do Ibex coa excepción de Repsol.

Este mércores, non obstante, o selectivo español finalizou a sesión cun rebote do 2,49% freando, polo menos de momento, a sangría que rexistraba desde o inicio da semana. O Ibex rematou en verde a pesar da ameaza do presidente estadounidense Donald Trump de cortar o comercio con España, despois de que o Goberno de Pedro Sánchez se negase a deixar que EE UU use as súas bases militares no país.

Inditex recuperou parte do perdido na bolsa, ao rebotar un 3,02% tras dúas xornadas nas que caeu case un 5% cada día. A acción intercámbiase a 53,26 euros, lonxe dos máximos de máis de 58 euros que alcanzou no que vai de 2026.