A patronal eólica aplaude a decisión do Tribunal Europeo pero teme que non haxa "solución inmediata" para os parques.

Diferentes interpretacións do fallo do tribunal europeo sobre a cuestión prejudicial que lle plantexou o Tribunal Superior de Xustiza de Galicia (TSXG) á pregunta de se a Xunta debía poñer a disposición do público informes sectoriais sobre parques eólicos para que puidesen, no seu caso, formular alegacións e participar nos procesos de toma de decisión sobre as autorizacións dos proxectos antes de que os mesmos fosen aprobados.

O tribunal comunitario indica que a normativa “non se opón” a que as administracións e os departamentos sectoriais implicados sexan consultados, “ao mesmo tempo que o público interesado, sen que este teña dereito a formular posteriormente” máis alegacións. A Xunta e a patronal eólica entenden que este fallo avala a súa fórmula de tramitación e servirá para desbloquear cerca de 92 parques eólicos parados nos xulgados. Con todo, os colectivos ambientalistas dos que, en moitos casos, partiu a ofensiva xudicial non o ven así. Uns e outros, en todo caso, parecen ter claro que a solución non vai ser inmediata.

“Un fito xudicial”

EGA, a patronal eólica, indicou, tras coñecerse o pronunciamento de Luxemburgo, que “celebra o pronunciamento contundente e taxativo”. “Dálle a razón á Xunta en canto á súa forma de tramitar os proxectos eólicos e permite pór fin a cinco anos convertidos nun deserto industrial en materia de enerxías renovables”, expresou, á vez que manifestou a súa vontade de que o fallo “sexan un fito xudicial que supoña un antes e un despois na reactivación e desenvolvemento do sector en Galicia”.

“A claridade do fallo debe levar a despejar calquera dúbida na interpretación e aplicación da normativa. Lembremos que hai arredor de 250 contenciosos, que se corresponden con outros tantos recursos, interpuestos por diversas asociacións antieólicas, onde se poñen en cuestión facetas de carácter ambiental e non de procedemento”, apunta.

Máis de 2.500 megavatios en xogo

Segundo datos da Consellería de Medio Ambiente, na actualidade hai 92 parques que suman uns 2.500 megavatios con recursos xudiciais en curso, dos 86 teñen a súa autorización administrativa suspendida por medidas cautelares. “Esta parálise obedece á posición adoptada polo TSXG, que fixo unha interpretación das medidas cautelares que determinan a práctica desaparición das enerxías renovables en Galicia. Porque boa parte destes proxectos están pendentes de resolución por parte do Tribunal Supremo como consecuencia da posición do tribunal galego. Isto derívase dunha interpretación xudicial que non se compadece coa lexislación vixente nin coa interpretación do Supremo, e agora confirmada polo TJUE”, afirma EGA.

En todo caso, a patronal eólica galega teme que o pronunciamento “non resolve” a situación “de forma inmediata”. Así, Para acelerar a solución a unha parálise, que teme non se leve a cabo de forma “inmediata”, opina que a “os centos de expedientes que acumula o Superior (TSXG) deberíaselle dar solución en distintos planos”. “Conviña que as administracións públicas realicen a trasposición pendente das directivas europeas do sector sobre o despregue e aceleración das enerxías renovables”, expón, xa que “España acaba de ser advertida por segunda vez ao respecto”.

Continúan as paralizacións

Exise que se adapte a lexislación correspondente, “asumindo a xurisprudencia das comunidades autónomas, do propio Estado e da UE, en aras de integrar definitivamente o interese público superior da enerxía como prevalente e como unha manifestación máis do interese ambiental”.

Pola súa banda, a asociación ecoloxista Adega manifestou a súa “decepción” ante a decisión do TJUE. Con todo, indicou que, malia iso, cre que o panorama non cambiará en gran medida. “Pese a sentirse decepcionada con esta interpretación da norma que, claramente, vai en contra do dereito a unha participación pública real e efectiva, esta non vai repercutir na maioría das paralizacións cautelares hoxe vixentes” polo que quere lanzar un “mensaxe de tranquilidade ás aquelas persoas, entidades e plataformas veciñais que, lexítimamente alcanzaron no TSXG a paralización cautelar dos proxectos en base a outros motivos xurídicos, ademais do das deficiencias nas tramitacións de exposición pública, como os relativos a deficiencias na avaliación ambiental ou aos posibles casos de fragmentación fraudulenta de proxectos”.