Ana Pontón critica desde Xilonor, a empresa impulsada por Finsa e Goiriz, a moratoria ‘fake’ do eucalipto.
A voceira nacional do BNG defende un monte multifuncional, solicita unha moratoria indefinida do eucalipto e avanza un conxunto de propostas para impulsar a construción industrializada con madeira de calidade.
Ana Pontón visita as instalacións de Xilonor en Coirós.
Comentarios
En un momento de debate no sector forestal sobre a moratoria do eucalipto e sobre o futuro que debuxan os datos do Inventario Forestal Continuo, a voceira nacional do BNG visitou a planta de Xilonor en Coirós (A Coruña), unha empresa pioneira na fabricación de CLT (madeira contralaminada) a partir de piñeiro galego para o seu uso na construción. Desde alí, Ana Pontón defendeu unha moratoria “indefinida” do eucalipto, co obxectivo, segundo destacou, de articular un monte “multifuncional”.
Considera que Xilonor, impulsada por Finsa e Goiriz, representa o modelo que precisa o país e ela está disposta a poñer o seu gran de area. Avanzou que o BNG presentará unha batería de propostas para impulsar a construción industrializada con madeira “de calidade”. Considera Pontón que a política industrial debe asentarse no I+D+i e pechar ciclos produtivos, que xeren valor engadido e sexan “sostibles co medio ambiente e co territorio”.
Por iso destacou o carácter innovador de Xilonor e a súa aposta pola transformación de piñeiro producido en Galicia e pola introdución de novos produtos no mercado. “Mostra o camiño que ten que seguir o noso país, que aposta por fixar poboación no rural, por aproveitar a innovación e o deseño e por un modelo de industria no que acreditamos desde o BNG”, afirmou.
Madeira para a vivenda pública
O BNG propón que o Instituto Galego de Vivenda e Solo aposte por que “en todas as construcións e rehabilitacións que se fagan desde o ámbito público se chegue a ese 20% de construción en madeira“. Tamén aboga por introducir cláusulas de sostibilidade e de redución da pegada de carbono e, por último, propón un plan de innovación, coa participación das universidades e o Colexio de Arquitectos “que posibilite un maior coñecemento sobre as vantaxes do uso da madeira e que permita mellorar a formación dos profesionais”.
