Rueda reclamará ao Goberno o envío de "todos os medios dispoñibles" para os incendios de Ourense

O presidente da Xunta enviará unha carta ao Executivo central para solicitar “calquera medio que haxa dispoñible que poida achegar á provincia de Ourense” e que se desprace á zona. Así o transmitiu, en declaracións aos medios, tras visitar este venres, xunto á conselleira de Medio Rural, María José Gómez, o centro de coordinación operativa (Cecop) provincial para facer o seguimento da situación dos lumes.

Alfonso Rueda fixo un chamamento á prudencia e un agradecemento a todos os equipos que están colaborando na extinción dos distintos incendios. O mandatario galego lembrou que son dez os que están activos, nove na provincia de Ourense e outro na de A Coruña.

“Seguen preocupándonos como estes días anteriores os de Ourense”, remarcou Rueda, quen destacou o feito de que non haxa ningún núcleo de poboación evacuado. Por agora, só se mantén o confinamento de máis dun centenar de persoas en Monterrei.

En relación ás infraestruturas insistiu en que o tráfico ferroviario seguirá interrompido ata poder garantir que non haxa “ningún problema de seguridade”.

Mil efectivos

O titular do Executivo galego destacou, así mesmo, o traballo dos efectivos, uns mil, así como os medios desprazados, entre eles hidroavións de Francia, aínda que reiterou o seu chamamento ao Goberno central para que “calquera medio que haxa dispoñible e se poida achegar á provincia de Ourense” se desprace á zona.

“Seguen traballando moito os efectivos de todas as administracións, volvo a agradecer a colaboración”, subliñou para aludir ao traballo de “todos os que teñen responsabilidades” e están “botando unha man” tanto na provincia de Ourense como noutras zonas de Galicia afectadas polos incendios.

“Facemos un chamamento hoxe mesmo, reiterareino por carta, ao Goberno central para que calquera medio que haxa dispoñible e se poida achegar na loita contra incendios na provincia de Ourense o fagan”, insistiu.

Mentres, manifestou que trasladarán a petición de que os membros da Brilat xa desprazados reorienten as súas tarefas para colaborar tamén coas Forzas e Corpos de Seguridade do Estado.

E é que este xoves, e en virtude dun convenio asinado entre o Ministerio de Defensa e a Xunta, a Brilat xa procedeu ao seu despregue para centrar a súa tarefa de vixilancia dos montes galegos que agora Rueda pediu reorientar para incentivar tamén a colaboración con outros equipos na zona ante a vaga de incendios existente.