Mercadona supera as 1.000 toneladas de alimentos doadas en Galicia nun ano
As doazóns diarias a entidades sociais son unha das estratexias da cadea de supermercados para a prevención do desperdicio alimentario.
Mercadona doou máis de 1.000 toneladas de alimentos en 2025 en Galicia
Comentarios
Mercadona doou 1.003 toneladas de produtos de primeira necesidade en Galicia o ano pasado, dentro da estratexia da cadea de supermercados para previr o desperdicio alimentario. Nun comunicado, a compañía de Juan Roig explica que colabora con 40 entidades sociais con presenza na comunidade e que os alimentos doados equivalen a máis de 16.700 carriños da compra.
O grupo líder da distribución alimentaria en España segue esta mesma estratexia en todo o Estado e en Portugal. No pasado exercicio, a doazón diaria permitiu aproveitar 20.000 toneladas de alimentos e produtos na rede de 1.670 tendas e bloques loxísticos. Como sucede en Galicia, esas 20.000 toneladas foron doadas a entidades sociais coas que colabora Mercadona, máis de 850.
Neste que vai de 2026, a cadea de supermercados doou a 130 entidades sociais un total de 550 neveiras e conxeladores que, unha vez deixaron de ter cabida na operativa da compañía, foron destinadas a organizacións sociais co obxectivo de facilitar o seu labor. Isto permite prolongar a súa vida útil e optimiza o uso dos recursos, ao tempo que se reforza a capacidade de almacenamento e conservación de alimentos destas entidades, segundo destaca Mercadona nun comunicado.
«En Mercadona contamos cun Plan de Acción Social para a colaboración con entidades sociais de España e Portugal, no marco das estratexias de prevención do desperdicio alimentario que implantamos desde hai anos. Entre elas, a doazón de alimentos ocupa un lugar especialmente relevante polo seu impacto social nas máis de 850 entidades sociais coas que colabora, ás que se doaron 20.000 toneladas de produtos, o equivalente a máis de 333.000 carriños da compra. É un claro exemplo de como unha xestión eficiente e responsable xera impacto positivo na empresa, a sociedade e o medio ambiente», destacou Laura Cruz, Coordinadora de Prevención e Xestión Alimentaria de Mercadona.
