Alcoa, a piques de vender unha fundición pechada nos EE UU a un xigante do bitcoin para un centro de datos
A conversión de centros industriais con conexión á rede eléctrica en data centers, unha posibilidade á que tamén fixeron referencia xigantes como Endesa en España, gaña popularidade nos Estados Unidos.
Bill Oplinger, CEO de Alcoa, xunto a Geoffrey Pyatt, da secretaría de Estado de Enerxía dos EEUU / Linkedin
Comentarios
Alcoa está a piques de pechar a súa primeira venda dunha antiga fundición de aluminio que será transformada nun centro de datos. O presidente da compañía propietaria do complexo de San Cibrao na Mariña lucense, Bill Oplinger, indicou a Bloomberg nunha recente entrevista que estaba en negociacións para traspasar a súa planta de aluminio primario en Massena East, no norte do estado de Nova York, á empresa de bitcoins NYDIG, para albergar un centro de datos.
Ao comezo do ano, Oplinger desvelou nunha conferencia con analistas que a multinacional exploraba a posibilidade de vender a compañías de centros de datos algunhas das súas fundicións inactivas. As plantas de aluminio primario, como por exemplo a de San Cibrao, son grandes consumidoras enerxéticas que teñen que estar conectadas á rede. Ese feito así como as súas localizacións, fan posible a súa reconversión en centros de datos.
Plan de venda de 10 activos pechados
Entón, o executivo explicou: “Ata agora, no que se refire a activos pechados e restrinxidos, sempre buscabamos vendelos para maximizar o valor e minimizar os pasivos. O que cambiou nos últimos dous anos, obviamente, é a chegada da IA e dos centros de datos. O que realmente intentamos comprender agora é o valor dos nosos sitios individuais no mundo da Intelixencia Artificial”. O presidente do grupo americano apuntou que, na actualidade, Alcoa conta con ata 10 activos pechados que pretenden vender para o mercado de centros de datos ou minería de bitcoins.
Dese 10 activos, a planta de Massena sería a primeira que logrou colocar no mercado. Situada ás beiras do río San Lorenzo, leva sen funcionar desde 2014, cando Alcoa determinou o seu peche debido aos altos custos enerxéticos. Trátase dunha instalación de unhas 526 hectáreas que se abastece, segundo os medios americanos, da enerxía do sistema hidroeléctrico do organismo denominado Autoridade de Enerxía de Nova York.
Dúas vendas máis
Na recente presentación de resultados de Alcoa correspondente ao primeiro trimestre do ano, Oplinger non se referiu directamente ao nome da potencial compradora, pero si indicou que estaban “en conversas avanzadas para a monetización da nosa antiga planta de Massena East para un proxecto de centro de datos”. “O posible desenvolvedor solicitou unha revisión pública”, engadiu.
O directivo indicou que a compañía non fará máis declaracións sobre a operación ata que se peche, pero adiantou que “avanza na venda doutros dous emprazamentos máis en paralelo”.
A posibilidade de que activos industriais desta índole se transformen en centros de datos non é algo que explore Alcoa en exclusiva. O pasado febreiro, unha das súas compañías rivais en Estados Unidos, Century Aluminium, vendeu unha antiga fundición de aluminio pechada e localizada en Kentucky que será reconvertida en data center.
Endesa e As Pontes
¿Podería replicarse en España a conversión de activos industriais en centros de datos? Hai uns meses, José Bogas, que esta semana abandonará o cargo de conselleiro delegado de Endesa, indicou que a antiga térmica de As Pontes sería un “emprazamento boísimo para un centro de datos”. Así, reivindicou que a única necesidade é que conten con conexión á rede eléctrica, algo que ten que ser garantido por Red Eléctrica na súa planificación.
Por outra banda, explicou que moitos grandes grupos contan “cos terreos precisos, as conexións aseguradas e a posibilidade de abastecemento próximo de enerxías renovables” para poder albergar centros de datos.
