Rueda defende o «equilibrio» co eucalipto: «É o sustento económico de moitas familias»
O presidente da Xunta considera que o aumento do 6% na superficie ocupada por eucaliptos débese a exemplares que "xa estaban plantados antes da moratoria" e que agora "teñen un tamaño que os fai entrar no inventario".
Roda, na sede da Secretaría Xeral de Emigración / Xunta
Comentarios
O presidente da Xunta defende a moratoria do eucalipto en Galicia.Alfonso Rueda subliñou que esta medida está encamiñada a “manter o equilibrio” entre as especies, ao tempo que argumentou que o eucalipto é “sustento económico para moitísimas familias”.
Tras ser preguntado polos últimos datos do inventario forestal continuo de Galicia, que aflora un crecemento do 6% da superficie de eucalipto (ata as 438.156 hectáreas), o presidente galego destacou a “transparencia” coa que funciona a Xunta e subliñou que “a proba é ese inventario” que se fixo público na pasada xornada e recalcou, na liña do xa manifestado na pasada xornada polos expertos, que se contabilizan eucaliptos que “xa estaban plantados antes da moratoria” e que agora “teñen un tamaño que os fai entrar no inventario”.
“Esa pode ser, probablemente, a causa principal dese aumento”, reflexionou, antes de destacar que o inventario mostra outros datos que “hai que poñer en valor”, como que “se mantén a superficie de coníferas e de frondosas”, polo que hai “un equilibrio”.
Na busca deste “equilibro” enmárcase esta nova moratoria impulsada pola Xunta, que se amplía ata 2030, pero inclúe supostos de flexibilización. “Agora toca desenvolver as determinacións da nova moratoria, recoller moitas das alegacións presentadas, ir todos da man”, apelou.
Sobre este punto, Rueda insistiu en que o eucalipto segue sendo “sustento económico de moitas familias e de moitas industrias”. Por iso, asegurou tamén que, desde a Xunta, era “perfectamente consciente” de que “a unanimidade total respecto a esas medidas é moi difícil de conseguir”. En todo caso, insistiu en que había “un apoio maioritario” tanto dos sectores que viven dos eucaliptos como dos que viven das coníferas.
