Manuel García volve asumir a presidencia de Greenalia tras o falecemento de Castellano.
O dono do grupo galego de renovables foi nomeado presidente da compañía en substitución de José María Castellano; o fillo do exvicepresidente de Inditex, que xa era conselleiro de Greenalia, será tamén secretario do consello.
Manuel García Pardo, principal accionista de Greenalia
Comentarios
Novo presidente en Greenalia. Aínda que non tan novo. Manuel García volve asumir o cargo tras o falecemento de José María Castellano, o exvicepresidente de Inditex que ocupou a presidencia do grupo de renovables desde o ano 2021. O grupo familiar do que fora tamén presidente de Novagalicia é accionista da compañía e está representado no consello polo seu fillo Pablo Castellano Vázquez, quen a partir de agora asumirá tamén o posto de secretario do consello.
Os cambios foron escriturados xa no Rexistro Mercantil e supoñen que o primeiro accionista de Greenalia e conselleiro delegado ostente tamén a presidencia do grupo. Manuel García controla a través da patrimonial Smarttia o 94% do capital. O outro 6% está en mans de Alazady, brazo inversor da familia Castellano.
Pablo Castellano Vázquez é o presidente de Alazady e de Nakadama desde o ano 2015, cando se executou o movemento sucesorio nas dúas sociedades coas que o seu pai movía o capital acumulado inicialmente grazas ao seu éxito en Inditex.
Greenalia, con 770 millóns en activos e en medio dunha forte aposta inversora nos Estados Unidos, xa tivo como presidente ao seu máximo accionista ata o ano 2021, cando cedeu o cargo a Castellano manténdose á fronte da dirección do grupo como CEO. Ademais de conselleiro, era secretario do consello, posto que deixa agora.
