Acciona e San José gañan o seu pulso xudicial ao Concello de Santiago por supostos impagos de impostos

Acciona e Grupo San José doblan o pulso ao Concello de Santiago de Compostela. A sección cuarta da Sala do Contencioso do Tribunal Superior de Xustiza de Galicia (TSXG) estimou o recurso presentado pola UTE que conformaban ambas firmas e tumba a sentenza que ditara o Xulgado do Contencioso Administrativo número 2 da capital galega o pasado mes de setembro.

Este tribunal dera a razón ao concello que encabeza Goretti Sanmartín e desestimara o recurso de reposición interposto por Acciona Construcción SA e Constructora San José SA UTE contra a providencia de apremio das liquidacións practicadas no ano 2023 polo concepto de taxa e imposto sobre instalacións, construcións e obra.

Ambas compañías adxudicáranse mediante a súa alianza o contrato para a construción do Edificio Fontán da Cidade da Cultura por un importe de 14,78 millóns de euros, o que supuña unha rebaixa de 2,2 millóns respecto ao importe de licitación (17 millóns). Ademais, ambas firmas comprometíanse a rematar os traballos en 24 meses fronte aos 30 inicialmente previstos, o que permitiría que o edificio estivese plenamente operativo en 2021 (Ano Xacobeo).

O orixe da disputa

Con motivo destas obras, o Concello ditou liquidacións tributarias en 2023 pero enviou esta notificación a un correo electrónico distinto ao que designara a UTE. Ante o impago, o Concello emitiu unha providencia de apremio que acabou desembocando nesta guerra xudicial que, por agora, gañan Acciona e San José.

Esta disputa xira en torno á potestade por parte da Administración de enviar as notificacións a un lugar distinto ao designado expresamente polo representante do contribuínte naqueles procedementos iniciados de oficio. Para xustificar a súa decisión, o TSXG traza un paralelismo cunha sentenza do ano 2025 na que o Tribunal Supremo dá a razón ao denunciante ao entender que o envío da notificación a un correo diferente ao facilitado “condicionou non só o seu puntual coñecemento, senón o mesmo dereito á defensa por parte do obrigado tributario”.

“A Administración tributaria deberá practicar as notificacións […] no domicilio expresamente designado”, recolle a sentenza. “O dito lévanos a fixar como doutrina que nos procedementos tributarios iniciados de oficio ou a instancia de parte, a Administración tributaria deberá practicar as notificacións polo cauce que sexa procedente ou obrigado, no domicilio expresamente designado polo contribuínte ou o seu representante legal, sobre todo cando diso dependa o seu dereito á defensa”, engade a sala presidida polo maxistrado Juan Selles.

Por todo iso, o TSXG declara incorrecta a actuación administrativa, invalida a notificación e estima o recurso presentado por Acciona e Grupo San José, aínda que non impón o pago das costas procesuais a ningunha das partes por tratarse dunha cuestión xurídica recente.