Copasa supera a ACS, OHLA e Acciona e parte como favorita para rematar a autoestrada Lugo-Sarria

Copasa está preto de facerse co maior contrato licitado no que vai de ano pola Axencia Galega de Infraestruturas. O grupo ourensán obtivo a mellor puntuación técnica no concurso para executar o último tramo da autoestrada entre Lugo e Sarria, orzamentado en 37,3 millóns, e presentou, ademais, a segunda mellor oferta económica entre as que non incorreron en temeridade. De facerse coa infraestrutura, a compañía que preside José Luis Suárez resarciríase da súa exclusión na Autoestrada da Costa da Morte, onde tamén logrou a mellor valoración técnica, mantendo a gran competitividade amosada nos últimos anos na obra pública da Xunta.

A segunda maior construtora galega podería beneficiarse, ademais, da exclusión das empresas que obtiveron a segunda e a terceira maior puntuación técnica. A UTE formada por Civis Global e Grupo Bascuas logrou 83,25 puntos, fronte aos 86,25 de Copasa, pero a oferta económica plantexou un desconto do 9,89%, moi por encima do limiar de temeridade do 8,2%. Taboada y Ramos e Ovisa conseguiron 83 puntos, pero tamén formularon unha oferta anormal, cunha rebaixa do 8,57%. Precisamente, unha alianza liderada por Taboada y Ramos fíxose co contrato para prolongar a Autoestrada da Costa da Morte beneficiándose da exclusión de Copasa, polo que agora en Lugo podería darse o caso inverso. En todo caso, antes da exclusión definitiva, as empresas poderán ratificarse e xustificar as súas ofertas.

Nin Florentino Pérez, nin Jacinto Rey

O segundo gran contrato do exercicio da Axencia Galega de Infraestruturas volve deixar sen premio ás grandes construtoras estatais. Acciona, en alianza con Canarga, obtivo 74,7 puntos; OHLA, en UTE con XAC e Orega, fíxoo mellor e alcanzou os 80 puntos; o grupo de Florentino Pérez foi o que máis preto estivo, cunha puntuación de 80,25 puntos a través da alianza entre Vías y Construcciones, filial de ACS, e a galega Vázquez y Reino.

A licitación para transformar o corredor Nadela-Sarria en autoestrada congregou ás tres maiores construtoras galegas. Ademais de Copasa, San José presentou oferta xunto con Francisco Gómez y Cia, outro pescador experto na obra pública da Xunta. Os de Jacinto Rey lograron 81 puntos na valoración técnica, pero presentaron un prezo máis caro que a construtora ourensá. Grupo Puentes, en UTE con Seranco e Prace, alcanzou os 78 puntos na puntuación técnica e presentou tamén unha oferta máis cara. Tanto San José como Puentes ofrecen un desconto algo superior ao 4%, fronte ao 6,86% de Copasa, que opta a executar a obra por 28,7 millóns máis IVE.

Unha vía para 8.000 vehículos diarios

O contrato permitirá realizar o desdobramento do tramo Nadela-A Pobra de San Xiao da AG-22, un traxecto de 13,5 quilómetros que se inicia na rotonda de Nadela e finaliza na conexión de A Pobra de San Xiao, xa en servizo. Conforma o último tramo da autoestrada entre Lugo e Sarria e conta entre as intervencións singulares previstas cos enlaces de O Corgo e Maceda, un cruce de vía baixo a autoestrada A-54, a execución de dous viadutos no río Chamoso e no de Neira ou a ampliación de 13 pasos superiores e sete inferiores.

Unha vez culminadas as obras, o actual corredor converterase nunha vía de alta capacidade, que acurtará o tempo de viaxe e contará con dúas calzadas con dous carrís cada unha. Ademais ofrecerá unha conexión moito máis eficiente cos grandes eixes de comunicación estatais, como a A-6 e a A-54, que conflúen no nó de Nadela. A Xunta estima que arredor de 100.000 usuarios se beneficiarán deste viario que estará limitado a 120 km/h. Prevese que circulen pola autoestrada máis de 8.000 vehículos ao día.