Rueda celebra que o Constitucional levante a suspensión ás repotenciacións eólicas
O presidente da Xunta sinala que agora poderán continuar co seu plan de repotenciación de parques eólicos e substituír torres antigas por outras máis modernas.
O titular do Goberno galego, Alfonso Rueda, comparece ante os medios tras o Consello da Xunta. – XUNTA
Comentarios
Satisfacción na Xunta coa decisión do Tribunal Constitucional de levantar a suspensión provisional de varios artigos da lei de medidas fiscais e administrativas que acompañou os orzamentos galegos en 2025 e que afectaba aos últimos cambios legais da Xunta en eólica –incluída a repotenciación– e dependencia e discapacidade.
Alfonso Rueda celebrou como unha “magnífica noticia” a decisión do TC. Así o fixo durante a súa intervención no peche do Congreso Maritime Trands Summit, organizado por Asime esta semana en Vigo, onde o mandatario galego puxo en valor que agora a Xunta poderá continuar co seu plan de repotenciación de parques eólicos.
Ao respecto, dixo que a idea é substituír torres antigas por outras máis modernas, o cal é unha “magnífica noticia” non só para o sector, senón tamén para o medio ambiente.
No mesmo evento, Rueda destacou a “defensa firme” do seu Goberno da eólica mariña. “Claro que se pode facer, podemos facelo, sabemos facelo e queremos facelo. Estas oportunidades non se poden deixar pasar”, reivindicou.
Adeus á suspensión provisional
O pleno do Tribunal Constitucional, por unanimidade, acordou levantar a suspensión provisional a varios artigos da lei de medidas fiscais e administrativas que acompañou os orzamentos galegos de 2025.
En concreto, o TC informou de que se levanta a suspensión provisional do artigo 30 (nos seus apartados 2, 13, 17, 19, 20, 21 e 25, e relativo á reordenación espacial e tecnolóxica dos parques eólicos galegos). Tamén do apartado 5 do artigo 45, relativo ao recoñecemento e prestacións de dependencia.
A suspensión decretárase ao ser admitido a trámite o recurso do Executivo central, que consideraba que os artigos en cuestión invadían as súas competencias.
Tanto a Xunta como o Parlamento de Galicia solicitaran o levantamento da suspensión, por entender que «non concorría a aparencia dun dereito» na pretensión do Estado nin se causaban «prexuízos irreparables no interese público ou de particulares».
